XI Европа кинофестивали: Тошкент ва Урганчда 11 та фильм намойиш этилади

22 октябрь куни Тошкентдаги Миллий кино санъати саройида XI Европа кинофестивалининг очилиш маросими бўлиб ўтди. Бу йил фестиваль Тошкент ва Урганч шаҳарларида ўтказилади. Дастурдан Европанинг 10 давлатида суратга олинган 11 та фильм ўрин олган.

Фестиваль Европа Иттифоқининг Ўзбекистондаги Делегацияси ва Кинематография агентлиги томонидан Европа давлатлари элчихоналари ҳамда маданият муассасалари кўмагида ташкил этилмоқда.

Очилиш маросими олдидан ўтказилган матбуот анжуманида Европа Иттифоқининг Ўзбекистондаги элчиси Тойво Клаар фестивалнинг ҳудудий қамрови кенгайганини алоҳида таъкидлади.

«Кино тадбирининг географиясини Тошкентдан ташқарига кенгайтириш Ўзбекистон вилоятларида маданий алмашинувни мустаҳкамлашга хизмат қилувчи яхши анъанага айланди», — деди Клаар.

Унинг таъкидлашича, фестиваль Европа маданиятининг хилма-хиллиги ва умуминсоний қадриятларни кино орқали кашф этишга йўл очади.

Ўзбекистон Киноарбоблари ижодий уюшмаси раиси Матёқуб Матчанов ҳам фестивалнинг маданий алоқалар ва кино соҳасидаги ҳамкорликни ривожлантиришда аҳамияти катталигини қайд этди.

«Европа кинофестивали маданиятлар ўртасидаги мулоқотни ривожлантириш ва ижодий тажриба алмашиш учун муҳим майдон ҳисобланади», — деди Матчанов.

Унинг сўзларига кўра, Ўзбекистон ва Европа давлатлари ўртасидаги ҳамкорликнинг муҳим йўналишлари қўшма фильмлар яратиш, тажриба алмашиш ва ўзбек фильмларини халқаро майдонда тарғиб қилишдан иборат.

Фестивалда қандай фильмлар намойиш этилади?

Фестивалнинг очилиш фильми Франция ва Люксембург ҳамкорлигида 2024 йилда суратга олинган «Боғдаги қайиқ» (Slocum et moi) анимацион картинaси бўлди. Жан-Франсуа Лагиони режиссёрлик қилган фильм 1950-йиллар бошида яшовчи Франсуа исмли боланинг оиласи билан боғда елканли кема қуриши ҳақида ҳикоя қилади. Унда қаҳрамоннинг болаликдан ўсмирликка ўтиши ва катта орзулар сари интилиши акс этган.

Дастурга Кипр, Франция, Германия, Греция, Италия, Латвия, Литва, Люксембург, Руминия ва Словения фильмлари киритилган. 

Томошабинлар ҳужжатли фильмлар, психологик драмалар, анимация, биографик картиналар ва романтик ҳикояларни кўришлари мумкин.

Фестиваль доирасида талабалар учун қисқа метражли фильмлар намойишлари ҳам ташкил этилади. Улар Ўзбекистон давлат жаҳон тиллари университети ва MOK HUB маданий маконидаги дастурларни қамраб олади.

Ташкилотчилар барча кино ихлосмандларини фестиваль намойишларига таклиф қилмоқда. Фильмлар 23–25 октябрь кунлари Тошкентдаги Миллий кино санъати саройида, 27 октябрь куни эса Урганчдаги Худойберган Девонов номидаги кинотеатрда намойиш этилади.

Барча намойишлар бепул бўлиб, фильмлар асл тилида ўзбекча ва/ёки русча субтитрлар билан тақдим этилади.