Малайзия компаниялари консорциуми Ўзбекистонга савдо миссиясини амалга оширади

Савдо миссиясидан мақсад – Ўзбекистонда савдо ва инвестициявий лойиҳаларни амалга ошириш имкониятларини ўрганиш.

Иқтисодиёт

06.08.2025, 10:05

Улашиш:

Малайзия ўрта даражадаги компаниялар консорциуми (MCMTC – Malaysian Consortium Mid-tier Companies) вакиллари билан видеоконференция кўринишида учрашув ўтказилди, деб хабар қилмоқда "Дунё" АА мухбири.

Учрашувда MCMTC ижрочи директори Карен Фэйрклауф билан 2025 йил 5-8 ноябрь кунлари MCMTC ва унга аъзо компаниялар вакилларидан иборат (жами 20 киши) делегациянинг Ўзбекистонга савдо миссиясини ташкил этишга келишиб олинди.

Савдо миссиясидан мақсад – Ўзбекистонда савдо ва инвестициявий лойиҳаларни амалга ошириш имкониятларини ўрганиш, давлат ва маҳаллий корхоналар билан икки томонлама ҳамкорлик музокараларини ўтказиш.

Малайзия томони Ўзбекистонга ташрифи давомида Савдо-саноат палатаси аъзолари билан "B2B" учрашувларини ўтказиш, Тошкент шаҳрида жойлашган чакана савдо, логистика ва омборхона, озиқ-овқат маҳсулотлари ишлаб чиқариш фаолияти билан шуғулланувчи корхоналарга ташриф буюриб, ҳамкорлик бўйича музокараларини олиб боришни режалаштирмоқда.

Икки мамлакат савдо-иқтисодий алоқаларни янада ривожлантириш учун MCMTC вакили Ўзбекистонлик етакчи тадбиркор аёлларини 2025 йил 25-27 ноябрь кунлари Куала-Лумпур шаҳрида бўлиб ўтадиган "WE2025: Future in Motion – Women in Trade, Investment, Leadership" кўргазмасида MCMTC павильонида ўз маҳсулот ва хизматлари, технология ва ишланмалари билан иштирок этишга таклиф қилди.

Малайзия ўрта даражадаги компаниялар консорциуми (Malaysian Consortium of Mid-Tier Companies) 2017 йилда MATRADE – Малайзия ташқи савдони ривожлантириш корпорацияси ўрта даражадаги компанияларни ривожлантириш дастури битирувчилари бўлган 19 аъзодан иборат гуруҳ сифатида ташкил этилган. Бугунги кунда ташкилот аъзолари 150 тага етган.

Иқтисодиёт

06.08.2025, 10:05

Улашиш:

#Малайзия

мавзуга оид янгиликлар