Malayziya kompaniyalari konsorsiumi Oʻzbekistonga savdo missiyasini amalga oshiradi

Malayziya oʻrta darajadagi kompaniyalar konsorsiumi (MCMTC – Malaysian Consortium Mid-tier Companies) vakillari bilan videokonferensiya koʻrinishida uchrashuv oʻtkazildi, deb xabar qilmoqda "Dunyo" AA muxbiri.

Uchrashuvda MCMTC ijrochi direktori Karen Feyrklauf bilan 2025 yil 5-8 noyabr kunlari MCMTC va unga aʼzo kompaniyalar vakillaridan iborat (jami 20 kishi) delegatsiyaning Oʻzbekistonga savdo missiyasini tashkil etishga kelishib olindi.

Savdo missiyasidan maqsad – Oʻzbekistonda savdo va investitsiyaviy loyihalarni amalga oshirish imkoniyatlarini oʻrganish, davlat va mahalliy korxonalar bilan ikki tomonlama hamkorlik muzokaralarini oʻtkazish.

Malayziya tomoni Oʻzbekistonga tashrifi davomida Savdo-sanoat palatasi aʼzolari bilan "B2B" uchrashuvlarini oʻtkazish, Toshkent shahrida joylashgan chakana savdo, logistika va omborxona, oziq-ovqat mahsulotlari ishlab chiqarish faoliyati bilan shugʻullanuvchi korxonalarga tashrif buyurib, hamkorlik boʻyicha muzokaralarini olib borishni rejalashtirmoqda.

Ikki mamlakat savdo-iqtisodiy aloqalarni yanada rivojlantirish uchun MCMTC vakili Oʻzbekistonlik yetakchi tadbirkor ayollarini 2025 yil 25-27 noyabr kunlari Kuala-Lumpur shahrida boʻlib oʻtadigan "WE2025: Future in Motion – Women in Trade, Investment, Leadership" koʻrgazmasida MCMTC pavilonida oʻz mahsulot va xizmatlari, texnologiya va ishlanmalari bilan ishtirok etishga taklif qildi.

Malayziya oʻrta darajadagi kompaniyalar konsorsiumi (Malaysian Consortium of Mid-Tier Companies) 2017 yilda MATRADE – Malayziya tashqi savdoni rivojlantirish korporatsiyasi oʻrta darajadagi kompaniyalarni rivojlantirish dasturi bitiruvchilari boʻlgan 19 aʼzodan iborat guruh sifatida tashkil etilgan. Bugungi kunda tashkilot aʼzolari 150 taga yetgan.