Telegram ва Instagramда “Мусодара товарлар” номли сохта гуруҳ эгалари ушланди

Бу ҳақда Тошкент вилояти ИИББ матбуот хизмати хабар берди.

Маълум қилинишича, Тошкент вилояти ИИББнинг Ахборот технологиялари соҳасидаги жиноятларга қарши курашиш бошқармаси ва унинг қуйи тизимлари томонидан ўтказилган навбатдаги тезкор-қидирув тадбири давомида Telegram ва Instagram’да Давлат божхона қўмитаси номидан сохта канал ва гуруҳлар очиб, фуқароларнинг пул маблағларини ўзлаштириб келган жиноий гуруҳ фош этилган.

Дастлабки суриштирувларга кўра, Андижон вилоятида яшовчи 22–25 ёшли 5 нафар шахс жорий йил бошида жиноий режа тузиб, Telegram ва Instagram ижтимоий тармоқларида “Мусодара товарлар” ҳамда “Оптом склад” номлари остида канал ва гуруҳлар ташкил этган. Шунингдек, улар “Божхона қўмитаси админи”, “Ишонч сиз билан” каби ўнга яқин сохта аккаунтлар орқали ўзларини гўёки божхона тизими ходимлари сифатида таништирган.

Жиноий гуруҳ аъзолари маиший техника, музлатгич ва телевизорлар, иситиш қозонлари, ошхона ва болалар мебеллари, турли гаджетлар, жумладан iPhone телефонларининг сўнгги моделлари ҳамда кийим-кечакларни жуда арзон нархларда таклиф қилган. Ҳатто аслида мавжуд бўлмаган мото-скутерларни етказиб беришни ваъда қилган. Тўлов маблағларининг бир қисми эса ўзга шахслар номига расмийлаштирилган банк карталари орқали қабул қилинган.

Натижада жиноий гуруҳ аъзолари дастлабки терговга қадар 60 нафар фуқаронинг ишончига кириб, фирибгарлик йўли билан жами 117 миллион сўм маблағни ўзлаштирган ҳамда пулларни шахсий эҳтиёжлари учун сарфлаб юборган. Маҳсулотни талаб қилган ёки қайта алоқага чиққан жабрланувчилар эса жавобсиз қолдирилиб, ижтимоий тармоқларда “қора рўйхат”га киритилган.

Мазкур ҳолат юзасидан жиноий гуруҳ аъзоларига нисбатан Ўзбекистон Республикаси Жиноят кодексининг 168-моддаси (фирибгарлик) 3-қисми “б” ва “г” бандлари билан жиноят иши қўзғатилиб, уларга нисбатан қамоқ эҳтиёт чораси қўлланилган. Ҳозирда тергов ҳаракатлари давом эттирилиб, фуқароларга етказилган моддий зарарни қоплаш чоралари кўрилмоқда.