Ўзбекистон-Озарбайжон: Нефть-газ соҳасида муҳим ҳужжат имзоланди

Энергетика вазирлигида Устюрт нефть-газ минтақасидаги инвестиция блокларида геология-қидирув ишларини амалга ошириш ва кейинчалик углеводородларни қазиб олишни назарда тутувчи маҳсулот тақсимоти тўғрисидаги битимни имзолаш маросими бўлиб ўтди.

Унда энергетика вазири Жўрабек Мирзамаҳмудов, «SOCAR»  компанияси президенти Ровшан Наджаф, "Ўзбекнефтгаз" АЖ бошқаруви раиси Баҳодиржон Сиддиқов сўзга чиқди.

Энергетика вазирлиги, Озарбайжон Республикасининг давлат нефть компанияси (SOCAR) ҳамда “Ўзбекнефтгаз” акциядорлик жамияти ўртасида имзоланган битим икки давлат ўртасидаги энергетика соҳасидаги шерикликни янги босқичга олиб чиқиб, углеводород ресурсларини излаш ва ўзлаштиришда узоқ муддатли ҳамкорлик учун мустаҳкам пойдевор яратади.

Битим шартларига мувофиқ, камида 1 минг квадрат километр майдонда 3D сейсморазведка ишларини амалга ошириш ва натижаларга кўра битта қудуқда геология-қидирув ишларини бошлаш режалаштирилган. Агар саноат аҳамиятига эга углеводород конлари аниқланса, томонлар уларни ўзлаштириш ва қазиб олиш босқичига ўтади.

– Имзоланган битим нафақат икки томонлама ҳамкорликни чуқурлаштиради, балки миллий нефть-газ тармоғини ривожлантириш йўлидаги навбатдаги муҳим қадам бўлади. Шу билан бирга, “Ўзбекнефтгаз” АЖнинг халқаро майдондаги очиқ, ишончли ва инновацион ҳамкор сифатидаги мавқеини янада мустаҳкамлайди, – деди жамият бошқаруви раиси Баҳодиржон Сиддиқов.

«SOCAR» билан ҳамкорлик Ўзбекистон учун инвестиция манбаларини диверсификация қилиш ҳамда халқаро илғор тажрибаларни татбиқ этиш борасида муҳим қадамдир. Устюрт ҳудуди юқори истиқболга эга бўлиб, маҳсулот тақсимоти тўғрисидаги битим ушбу ҳудудни самарали ривожлантириш учун муҳим пойдевор бўлади.

Мутахассисларнинг маълумот беришича, маҳсулот тақсимоти тўғрисидаги битим давлат ва инвестор ўртасидаги шартномавий муносабатларнинг ўзига хос шакли бўлиб, унга кўра инвестор геологик-қидирув ишлари, углеводородларни қазиб чиқариш ва ўзлаштиришни амалга ошириш ҳуқуқига эга бўлади. 

Инвестор лойиҳага сарфлаган харажатларни қазиб чиқарилган ресурсларнинг бир қисм компенсация маҳсулоти орқали қоплайди. Қолган даромадли маҳсулот эсадавлат ва инвестор ўртасида белгиланган улушда тақсимланади. Бундай модель инвестициявий хавфлар вадаромадларни адолатли тақсимлашни таъминлайди, тўғридан-тўғри хорижий инвестицияларни жалб этади ҳамда илғор технологияларни мамлакатга олиб киришга кўмаклашади.

Маросим якунида томонлар ушбу имзоланган битимнинг моҳияти, амалга оширилиши ва истиқболдаги аҳамияти ҳақидаги оммавий ахборот воситалари вакиллари саволларига жавоб қайтарди.