Oʻzbekiston-Ozarbayjon: Neft-gaz sohasida muhim hujjat imzolandi

Energetika vazirligida Ustyurt neft-gaz mintaqasidagi investitsiya bloklarida geologiya-qidiruv ishlarini amalga oshirish va keyinchalik uglevodorodlarni qazib olishni nazarda tutuvchi mahsulot taqsimoti toʻgʻrisidagi bitimni imzolash marosimi boʻlib oʻtdi.

Unda energetika vaziri Joʻrabek Mirzamahmudov, «SOCAR»  kompaniyasi prezidenti Rovshan Nadjaf, "Oʻzbekneftgaz" AJ boshqaruvi raisi Bahodirjon Siddiqov soʻzga chiqdi.

Energetika vazirligi, Ozarbayjon Respublikasining davlat neft kompaniyasi (SOCAR) hamda “Oʻzbekneftgaz” aksiyadorlik jamiyati oʻrtasida imzolangan bitim ikki davlat oʻrtasidagi energetika sohasidagi sheriklikni yangi bosqichga olib chiqib, uglevodorod resurslarini izlash va oʻzlashtirishda uzoq muddatli hamkorlik uchun mustahkam poydevor yaratadi.

Bitim shartlariga muvofiq, kamida 1 ming kvadrat kilometr maydonda 3D seysmorazvedka ishlarini amalga oshirish va natijalarga koʻra bitta quduqda geologiya-qidiruv ishlarini boshlash rejalashtirilgan. Agar sanoat ahamiyatiga ega uglevodorod konlari aniqlansa, tomonlar ularni oʻzlashtirish va qazib olish bosqichiga oʻtadi.

– Imzolangan bitim nafaqat ikki tomonlama hamkorlikni chuqurlashtiradi, balki milliy neft-gaz tarmogʻini rivojlantirish yoʻlidagi navbatdagi muhim qadam boʻladi. Shu bilan birga, “Oʻzbekneftgaz” AJning xalqaro maydondagi ochiq, ishonchli va innovatsion hamkor sifatidagi mavqeini yanada mustahkamlaydi, – dedi jamiyat boshqaruvi raisi Bahodirjon Siddiqov.

«SOCAR» bilan hamkorlik Oʻzbekiston uchun investitsiya manbalarini diversifikatsiya qilish hamda xalqaro ilgʻor tajribalarni tatbiq etish borasida muhim qadamdir. Ustyurt hududi yuqori istiqbolga ega boʻlib, mahsulot taqsimoti toʻgʻrisidagi bitim ushbu hududni samarali rivojlantirish uchun muhim poydevor boʻladi.

Mutaxassislarning maʼlumot berishicha, mahsulot taqsimoti toʻgʻrisidagi bitim davlat va investor oʻrtasidagi shartnomaviy munosabatlarning oʻziga xos shakli boʻlib, unga koʻra investor geologik-qidiruv ishlari, uglevodorodlarni qazib chiqarish va oʻzlashtirishni amalga oshirish huquqiga ega boʻladi. 

Investor loyihaga sarflagan xarajatlarni qazib chiqarilgan resurslarning bir qism kompensatsiya mahsuloti orqali qoplaydi. Qolgan daromadli mahsulot esadavlat va investor oʻrtasida belgilangan ulushda taqsimlanadi. Bunday model investitsiyaviy xavflar vadaromadlarni adolatli taqsimlashni taʼminlaydi, toʻgʻridan-toʻgʻri xorijiy investitsiyalarni jalb etadi hamda ilgʻor texnologiyalarni mamlakatga olib kirishga koʻmaklashadi.

Marosim yakunida tomonlar ushbu imzolangan bitimning mohiyati, amalga oshirilishi va istiqboldagi ahamiyati haqidagi ommaviy axborot vositalari vakillari savollariga javob qaytardi.