Ўзбекистон ТИВ Россияда таксичини ҳақорат қилиш ҳолати бўйича текширув ўтказишни талаб қилди

Ижтимоий тармоқларда Москва яқинидаги Химки шаҳрида тасвирга олинган видео тарқалган эди. Ёзувда бир киши ҳақоратли сўзлар билан такси ҳайдовчисини камситаётгани акс этган. Гувоҳларнинг сўзларига кўра, можаро ҳайдовчи чиқиндичи машинаси ўтиб кетишини кутиб, кўп қаватли уй ҳовлисига кириш йўлини қисқа вақтга тўсиб қўйгани учун келиб чиққан.

Ўзбекистон ТИВ мазкур воқеага муносабат билдириб, фуқароларнинг ҳуқуқларини ҳимоя қилиш давлат сиёсатида устувор йўналиш эканини ва давлатнинг ўз фуқаролари олдидаги мажбурияти сифатида қаралишини таъкидлади.

«Агар фуқароларимизнинг ҳуқуқлари, эркинликлари, қонуний манфаатлари бузилса ёки шаъни камситилса, улар зудлик билан ўша мамлакатнинг тегишли ҳуқуқни муҳофаза қилувчи органларига мурожаат қилиши зарур. Шунингдек, Ўзбекистоннинг дипломатик ва консуллик муассасалари орқали ҳуқуқий ва консуллик ёрдамини олиш ҳуқуқига эгадирлар», — дейилади расмий баёнотда.

Ўзбекистон ТИВ матбуот котиби Аҳрор Бурхоновнинг маълум қилишича, Россия ТИВига расмий нота юборилиб, видеода акс этган кишининг шахсини аниқлаш ва унга нисбатан қонун доирасида чора кўриш талаб қилинган.