Антикоррупция агентлиги 2025 йилда олинган совғалар рўйхатини ошкор қилмади

Ўзбекистон Коррупцияга қарши кураш агентлиги идора вакиллари томонидан 2025 йилда олинган совғалар бўйича маълумот тақдим этиш ҳақидаги сўровга жавоб бермади. Мазкур сўров Замонавий журналистикани ривожлантириш маркази томонидан 17 ноябрь куни Агентликка юборилган.

«Оммавий ахборот воситалари тўғрисида»ги қонунга мувофиқ, давлат органлари ОАВ сўровларига 7 кун ичида жавоб беришлари шарт.

Марказ томонидан қуйидаги саволларга жавоб сўралган эди:

1. 2025 йилда Агентлик вакиллари томонидан олинган совғалар рўйхатини тақдим этиш;
2. Агентлик томонидан бошқа вазирлик ва давлат органларида олинган совғалар бўйича марказлашган мониторинг олиб борилиши ҳақида маълумот бериш.

Маълумот ўрнида, 2023 йил 13 март куни давлат фуқаролик хизматчилари хизмат сафари, халқаро ва бошқа расмий тадбирлар доирасида олиши мумкин бўлган совғалар қиймати ҳамда уларни тасарруф этиш тартибини белгилайдиган низом тасдиқланган. Ушбу ҳужжат давлат органларида совғалар реестрларини юритишни назарда тутса-да, уларни оммавий ошкор этиш талабини белгиламайди.

2023 йилда олинган совғалар

2023 йилда олинган саккизта эсдалик совғаси ва деворий суратларнинг умумий қиймати 14,57 миллион сўмни ташкил этган. Энг қиммат совға Миср Маъмурий назорат бошқармаси раҳбаридан олинган ҳайкалча бўлиб, унинг қиймати 3,2 миллион сўмга тенг.

Шунингдек, Тожикистон, Қозоғистон, Озарбайжон, Қирғизистон ва Афғонистоннинг коррупцияга қарши кураш идоралари томонидан тақдим этилган қиймати 1,35 миллион сўмдан 2,5 миллион сўмгача бўлган эсдалик совғалар реестрда қайд этилган.

2024 йилда олинган совғалар

2024 йилда Агентлик расмий ҳамкорларига умумий қиймати 14 миллион сўмдан ортиқ совғалар топширган. Шу билан бирга, Агентлик ходимлари томонидан олинган ва реестрда акс эттирилган совғаларнинг умумий қиймати 32 миллион сўмдан ошган.

Реестр маълумотларига кўра, энг фаол ҳамкор давлатлар сифатида Қатар (давлат аудити органлари, прокуратура ва суд тизими), Малайзия (коррупцияга қарши кураш идоралари, академиялар ва ННТлар), шунингдек Тожикистон ва Қозоғистон қайд этилган. Бу 2024 йилда расмий совғалар алмашинуви бўйича қайси давлатлар билан алоқалар энг жадал бўлганини кўрсатади.

Низомга кўра, агар давлат органи ходимига берилган совға қиймати базавий ҳисоблаш миқдорининг тўрт бараваридан (1,6 миллион сўм) кам бўлса, у ходим ихтиёрида қолади. Агар ушбу меъёрдан ошса, совға давлат органи балансига ўтказилиб, идора эҳтиёжлари учун фойдаланилиши мумкин.