Энди Ўзбекистонда Apple Pay ва Google Pay орқали тўлов қилиш мумкин

Ўзбекистонда 27 октябрдан маҳаллий банклар чиқарган айрим Visa ва Mastercard карталарини Apple Pay ва Google Pay хизматларига улаш имконияти пайдо бўлди. Эндиликда фойдаланувчилар харидлар учун iPhone ёки Android смартфони, шунингдек, мос ақлли соатлар орқали контактсиз тўловларни амалга ошириши мумкин.

Apple Wallet’да эълон қилинган маълумотларга кўра, ҳозирча саккизта банк ва финтех хизмати карталари қўллаб-қувватланмоқда. Улар орасида Uzum, Orient Finans Bank, Миллий банк, Kapitalbank, Hamkorbank, Ipak Yo‘li Bank, TBC Bank ва Octobank бор. Бироқ барча банкларда карталарнинг ҳар бир тури ҳам ишламаслиги мумкин.

Google Wallet эса AVO Bank, Octobank, Uzum Bank, TBC Bank, Aloqabank, Kapitalbank, Ipak Yo‘li Bank, Миллий банк ва Orient Finans Bank карталарини қўллаб-қувватлайди.

Ҳозирча иккала хизматда ҳам асосан Visa ва Mastercard карталаридан фойдаланиш мумкин. Миллий тўлов тизимлари — HUMO ва Uzcard карталари рўйхатга киритилмаган.

Google Wallet орқали контактсиз тўлов қилиш учун Android қурилмасида NFC функцияси бўлиши керак. Ҳар икки хизмат орқали тўлов қилишдан олдин картани тегишли электрон ҳамёнга қўшиш лозим.

Google вакили Марчин Красуски 19 октябрь куни Самарқандда Google Pay Ўзбекистонда ишга туширилганини эълон қилган эди. 22 октябрда Туризм қўмитаси Apple Pay ҳам яқин кунларда ишга тушишини билдирган.

Apple’нинг расмий қўллаб-қувватланадиган мамлакатлар рўйхатида эса Ўзбекистон ҳозирча кўрсатилмаган.

Халқаро тўлов хизматларини ишга туширишга тайёргарлик шахсга доир маълумотларни хорижда сақлаш ва қайта ишлашга оид қонунчилик ўзгарганидан сўнг фаоллашди. Президент Шавкат Мирзиёев март ойида тегишли қонунни имзолаган эди.

Хабарларга кўра, HUMO ва Uzcard карталарини ҳам улаш имкониятини яратиш бўйича ишлар олиб борилмоқда.