updated: 22.03.2026, 02:38

Ислоҳот – вазирлик номини ўзгартириш, холосми?

Яна бир савол: ташкилот номи ҳар ўзгариши солиқ тўловчилар гарданига қанча юк бўлиб тушяпти? Пешлавҳа, ёзув табличкалари, логотип, муҳр ва штамплардан тортиб, меҳнат ва бошқа шартномаларгача – булар қанча туради ва кимнинг ҳисобидан янгиланади? Яна ҳар икки-уч йилда бир ном янгиланиши — бу ёғи энди жуда ошиб кетмадими? Шунча харажат ва ҳаракатга яраша нимадир ўзгарса ҳам майли эди!

Ўзбекистон

24.11.2025, 10:45

Lotinchada

Улашиш:

Ислоҳот – вазирлик номини ўзгартириш, холосми?

1988 йилда ташкил топган Ўзбекистон Табиатни муҳофаза қилиш давлат қўмитаси 2017 йилда Экология ва атроф-муҳитни муҳофаза қилиш давлат қўмитаси дея қайта ташкил этилди.

Орадан икки йил ўтиб, 2019 йил 30 январда қўмита тугатилиб, унинг асосида «Экология ва атроф-муҳитни муҳофаза қилиш вазирлиги» ташкил этилди.

Бироқ вазирлик ҳам узоқ яшамади, 2025 йил 19 ноябрь куни вазирлик қайтадан қўмитага айлантирилиб, «Экология ва иқлим ўзгариши миллий қўмитаси» номини олди.

Шу ўринда юқоридагилар ислоҳот деганда фақат вазирлик ёки ташкилот номини ўзгартириб, вазирни қўмита раиси, раисни маслаҳатчи, Алини Вали деб аташ, унинг дўпписини бунга, бунинг телпагини унга кийдиришни тушунишадими?

7 йилда номи 3 марта ўзгарган ташкилот амалда нима қила олишига гувоҳ бўлиб келяпмиз. Ҳамма жой чангга буланганини, майли, глобал иқлим ўзгариши билан хаспўшлайлик, лекин нега мораторийга қарамасдан дарахткушлик, дарё ўзанларининг очофатларча талон-торож қилинаётгани, тартибсиз ва назоратсиз қурилишлар, сув ҳафзаларининг ифлосланиши ҳамон давом этмоқда?

Жаноблар! Ўзингизни ишлаётгандек кўрсатишни бас қилиб, амалий чоралар кўришга ўтарсизлар балки? Ахир вақт ўтяпти, ўзгаришлар кутилгандан кўра жадаллашди, ҳаракатсизлигингиз оқибати ҳамма жойда кўринишни, саратондек “метастаза” беришни бошлади-ку! Бир-бирларингга “нима қиламиз-нима қиламиз”, деган пайтда вазирлик ва ташкилотлар номини ўзгартириб ном топаётганларга эмас, соҳанинг ҳақиқий эгаларига, жонкуярларига, олим ва мутахассисларига ҳам қулоқ тутинглар! Илтимос, номнинг ўзи жуда зўр, тушунарли ва ҳамма нарсани ифода этиб турибди. Ишни қилинглар! Ишни!

Санжар Саид

Ўзбекистон

24.11.2025, 10:45

Улашиш:

#ислоҳот

мавзуга оид янгиликлар