“Мега” писта ишлаб чиқарувчиси “Trend” бренди устидан шикоят қилди

Рақобат қўмитасига “MEGA” бренди остида писта ишлаб чиқарувчи компания мурожаат қилган. Унда айтилишича, “TREND” бренди ишлаб чиқарувчиси инсофсиз рақобат ва номақбул (нотўғри) реклама қилган.

“MEGA” бренди обрўйига путур етказилган

Мурожаатга кўра, “TREND” брендининг ижтимоий тармоқларда жойлаштирилган реклама роликларида ўз маҳсулоти “MEGA” пистасидан устун эканлигига ишора қилинган.

Шунингдек, рекламада “MEGA” брендининг обрўйига путур етказувчи лавҳалар ҳам қўлланилган, бу эса бренднинг ишчанлик обрўйига путур етказган.

“Реклама тўғрисида”ги Қонуннинг 16-моддасига кўра, номақбул (нотўғри) рекламага йўл қўйилмайди.

Жарима қўлланилди

Рақобат қўмитасининг Махсус комиссияси “OZIQ OVQAT STANDART KARTON” МЧЖ (“TREND” бренди)га нисбатан “Реклама тўғрисида”ги Қонун талаблари бузилгани аломатлари билан иш қўзғатди.

Комиссия номақбул (нотўғри) рекламага йўл қўйилганини эътироф этди.

Натижада белгиланган тартибда молиявий жарима қўлланилиб, қонунбузарликни бартараф этиш ва бундай ҳолатни келгусида такрорламаслик бўйича кўрсатма берилди.

Ушбу иш доирасида “Реклама тўғрисида”ги Қонун талабларини бузиб, ижтимоий тармоқларда аксилреклама материалларини жойлаштирган блогер Абдураҳмон Фазиловга нисбатан маъмурий жавобгарлик чораларини белгилаш масаласи ҳам кўриб чиқилмоқда.