“Mega” pista ishlab chiqaruvchisi “Trend” brendi ustidan shikoyat qildi

Raqobat qo‘mitasiga “MEGA” brendi ostida pista ishlab chiqaruvchi kompaniya murojaat qilgan. Unda aytilishicha, “TREND” brendi ishlab chiqaruvchisi insofsiz raqobat va nomaqbul (noto‘g‘ri) reklama qilgan.

“MEGA” brendi obro‘yiga putur yetkazilgan

Murojaatga ko‘ra, “TREND” brendining ijtimoiy tarmoqlarda joylashtirilgan reklama roliklarida o‘z mahsuloti “MEGA” pistasidan ustun ekanligiga ishora qilingan.

Shuningdek, reklamada “MEGA” brendining obro‘yiga putur yetkazuvchi lavhalar ham qo‘llanilgan, bu esa brendning ishchanlik obro‘yiga putur yetkazgan.

“Reklama to‘g‘risida”gi Qonunning 16-moddasiga ko‘ra, nomaqbul (noto‘g‘ri) reklamaga yo‘l qo‘yilmaydi.

Jarima qo‘llanildi

Raqobat qo‘mitasining Maxsus komissiyasi “OZIQ OVQAT STANDART KARTON” MCHJ (“TREND” brendi)ga nisbatan “Reklama to‘g‘risida”gi Qonun talablari buzilgani alomatlari bilan ish qo‘zg‘atdi.

Komissiya nomaqbul (noto‘g‘ri) reklamaga yo‘l qo‘yilganini e’tirof etdi.

Natijada belgilangan tartibda moliyaviy jarima qo‘llanilib, qonunbuzarlikni bartaraf etish va bunday holatni kelgusida takrorlamaslik bo‘yicha ko‘rsatma berildi.

Ushbu ish doirasida “Reklama to‘g‘risida”gi Qonun talablarini buzib, ijtimoiy tarmoqlarda aksilreklama materiallarini joylashtirgan bloger Abdurahmon Fazilovga nisbatan ma’muriy javobgarlik choralarini belgilash masalasi ham ko‘rib chiqilmoqda.