Ўзбекистонда 1 ГВт қувватли узлуксиз “яшил” энергия лойиҳаси режалаштирилмоқда

Ўзбекистон қайта тикланувчи энергия манбаларини жорий этишда нафақат минтақавий, балки глобал трендларни ҳам шакллантиришга интилмоқда.

Мазкур лойиҳа ўзининг ўзаро тўлдирувчи технологик ечими билан анъанавий электр станцияларидан тубдан фарқ қилади. У икки асосий йўналишни қамраб олади:

• юқори самарадорликка эга қуёш панеллари орқали электр энергияси ишлаб чиқариш;
• энергияни сақлаш учун катта қувватли аккумулятор батареялари мажмуаси.

Бундай тизим кундузи ишлаб чиқарилган энергияни батареяларда захиралаб, уни тунги вақтда ҳам электр тармоғига узлуксиз узатиш имконини беради.

Ҳисоб-китобларга кўра, 1 ГВт қувват тахминан 1 миллионгача хонадонни экологик тоза электр энергияси билан таъминлаши мумкин. Бу эса аҳолининг энергияга бўлган талабини қондириш билан бирга, анъанавий ёқилғи ресурсларини тежаш ва атмосферага чиқарилаётган зарарли газлар миқдорини камайтиришга хизмат қилади.

Соҳа мутахассислари таъкидлашича, Ўзбекистонда амалга оширилиши режалаштирилаётган мазкур лойиҳа қайта тикланувчи энергия манбаларини миллий электр тармоғига интеграция қилиш бўйича муҳим тажрибага айланиши мумкин. Агар “24/7” ёки “Round-the-clock” модели амалиётда ўз самарасини кўрсатса, у энергия таъминоти барқарорлигини таъминлаш ва энергия танқислиги муаммосини ҳал этишда бошқа давлатлар учун ҳам муҳим намуна бўлиб хизмат қилиши мумкин.