Экологлар эътирозларидан сўнг ҳукумат Чорвоқдаги Sea Breeze лойиҳасига қўйиладиган талабларни кучайтирди

Вазирлар Маҳкамаси қарори лойиҳасига мувофиқ, қурилиш Чорвоқ сув омборининг экологик ҳолатига салбий таъсир кўрсатмаслиги зарур. Мабодо экотизимга зарар етказилгани аниқланса, лойиҳа тўхтатилади, ер майдони давлат фойдасига олиб қўйилади ва инвестиция шартномаси бекор қилинади.

Лойиҳанинг энг муҳим талабларидан бири — Чорвоқ сув омборига ва Чирчиқ дарёсига ифлос сувларни тушириш қатъиян тақиқланади. Инвестор ўз ҳисобидан замонавий тозалаш ва сувни қайта ишлаш тизимини ўрнатиши шарт.

Лойиҳанинг ҳар бир босқичида — ҳужжат тайёрлашдан то фойдаланишга топширишгача унинг қонунийлиги ва шаффофлиги Бош прокуратура ҳамда Вазирлар Маҳкамаси томонидан назорат қилинади. Бош прокуратура айниқса шаҳарсозлик ва экологик меъёрларга амал қилинишига алоҳида эътибор қаратади.

Расул Кушербаевнинг айтишича, қарор қабул қилишда экологик фаоллар билдирган хавотир ва эътирозлар инобатга олинган.

Хавотир билдирганлар орасида Facebook'да ўз фикрини баён қилган фаол Хуршида Якубова ҳам бор. У лойиҳанинг Тошкент ичимлик сув таъминотига салбий таъсири бўлиши мумкинлиги ҳақида огоҳлантирган:

«Чорвоқ қирғоғида амалга оширилаётган Sea Breeze Uzbekistan лойиҳасига қараганимда, «денгиз — болалар ўйинчоғи эмас» дегим келади. Чорвоқ нимадан иборат? Бу — Тошкент ва унинг атрофи учун стратегик аҳамиятга эга ичимлик сув захирасидир… 2019 йилда сув ҳажми 7 фоизга камайган ва бу юз минглаб гектар қишлоқ хўжалиги ерларининг суғорилишида муаммолар келтириб чиқарган», — деб ёзди у.