Ekologlar eʼtirozlaridan soʻng hukumat Chorvoqdagi Sea Breeze loyihasiga qoʻyiladigan talablarni kuchaytirdi

Vazirlar Mahkamasi qarori loyihasiga muvofiq, qurilish Chorvoq suv omborining ekologik holatiga salbiy taʼsir koʻrsatmasligi zarur. Mabodo ekotizimga zarar yetkazilgani aniqlansa, loyiha toʻxtatiladi, yer maydoni davlat foydasiga olib qoʻyiladi va investitsiya shartnomasi bekor qilinadi.

Loyihaning eng muhim talablaridan biri — Chorvoq suv omboriga va Chirchiq daryosiga iflos suvlarni tushirish qatʼiyan taqiqlanadi. Investor oʻz hisobidan zamonaviy tozalash va suvni qayta ishlash tizimini oʻrnatishi shart.

Loyihaning har bir bosqichida — hujjat tayyorlashdan to foydalanishga topshirishgacha uning qonuniyligi va shaffofligi Bosh prokuratura hamda Vazirlar Mahkamasi tomonidan nazorat qilinadi. Bosh prokuratura ayniqsa shaharsozlik va ekologik meʼyorlarga amal qilinishiga alohida eʼtibor qaratadi.

Rasul Kusherbayevning aytishicha, qaror qabul qilishda ekologik faollar bildirgan xavotir va eʼtirozlar inobatga olingan.

Xavotir bildirganlar orasida Facebook'da oʻz fikrini bayon qilgan faol Xurshida Yakubova ham bor. U loyihaning Toshkent ichimlik suv taʼminotiga salbiy taʼsiri boʻlishi mumkinligi haqida ogohlantirgan:

«Chorvoq qirgʻogʻida amalga oshirilayotgan Sea Breeze Uzbekistan loyihasiga qaraganimda, «dengiz — bolalar oʻyinchogʻi emas» degim keladi. Chorvoq nimadan iborat? Bu — Toshkent va uning atrofi uchun strategik ahamiyatga ega ichimlik suv zaxirasidir… 2019 yilda suv hajmi 7 foizga kamaygan va bu yuz minglab gektar qishloq xoʻjaligi yerlarining sugʻorilishida muammolar keltirib chiqargan», — deb yozdi u.