Sea Breeze Uzbekistan ҳужжатлари экологик экспертизага тақдим этилмаган

Бу ҳақда марказ директори Ғайрат Мухамедов 23 январь куни Бўстонлиқ туманида ўтган жамоатчилик эшитувида маълум қилди.

Унинг айтишича, Вазирлар Маҳкамасининг 541-сонли қарорига мувофиқ, экологик экспертиза ўтказишдан олдин жамоатчилик эшитуви ташкил қилиниши шарт. Фақат ушбу жараён якунлангач, лойиҳа ҳужжатлари Давлат экологик экспертизаси марказига топширилади.

«Жамоатчилик эшитувидан сўнг Sea Breeze Uzbekistan раҳбарияти томонидан баённома илова қилинган ҳолда экологик лойиҳа бизга тақдим этилиши керак. Шундан кейин ҳужжатларни ўрганиб, экологик экспертиза ўтказишни бошлаймиз. Лойиҳа йирик бўлгани сабабли жараёнга хорижий мутахассисларни ҳам жалб қилиш режалаштирилган. Экспертиза тахминан 2–3 ой давом этади», — деди Ғайрат Мухамедов.

Марказ директори, шунингдек, Sea Breeze Uzbekistan лойиҳасининг экологик ҳужжатлари Ўзбекистон Фанлар академияси ҳузуридаги Ботаника институти ва Зоология институти олимлари томонидан ҳам ўрганилишини таъкидлади. Экологик экспертиза хулосалари марказнинг расмий веб-сайти ва ижтимоий тармоқларда жамоатчиликка эълон қилинади.

«Агар ўсимлик ёки ҳайвонот дунёсига зарар етказилгани аниқланса, компенсация тўловлари Sea Breeze Uzbekistan томонидан тўлиқ қопланади ва зарар ўрнига тикланади», — деди у.

Экология ва иқлим ўзгариши миллий қўмитаси ҳузуридаги жамоатчилик кенгаши раиси Наталя Шивалдова ҳам Зоология ва Ботаника институтлари вакиллари лойиҳанинг атроф-муҳитга таъсирини баҳолаш жараёнига жалб этилишини билдирди.

«Экологик экспертизага оид барча материаллар жамоатчиликка очиқ тақдим этилади. Ҳозирча ҳайвонот ва ўсимлик дунёсига зарар етказиш режалаштирилмаган», — деди у.