Президент Янги Тошкентда амалга оширилаётган лойиҳалар тақдимоти билан танишди

Янги шаҳар қурилиши 2023 йилда бошланган. Британиянинг Cross Works архитектура компанияси ишлаб чиққан лойиҳа доирасида Юқоричирчиқ ва Ўртачирчиқ туманларидан 19,7 минг гектар ер ажратилган.

Ўзбекистон

21.08.2025, 09:56

На русском языке

Улашиш:

Фото: Пресс-служба президента Республики Узбекистан

1-босқичда 6 минг гектар майдон қамраб олинган бўлиб, бу ерда 600 минг нафар аҳоли учун замонавий шарт-шароит яратилиши режалаштирилган. Кейинчалик шаҳарда аҳоли сони 2 миллион кишига етиши мумкин.

Ҳозирда ерости инженерлик инфратузилмалари – иссиқлик, сув таъминоти, электр тармоқлари ва телекоммуникация учун коллекторлар қурилмоқда. Шунингдек, тоннеллар ва ер ости автотураргоҳлари барпо этилмоқда.

Шаҳарсозлик ечимлари доирасида экологик барқарор транспорт тизими – метро, электробуслар, шунингдек, пиёдалар ва велойўллар учун шароит яратиш назарда тутилган.

Маъмурий қисмида давлат муассасалари учун 60 дан ортиқ иншоот қурилиши режалаштирилган. Айрим вазирлик ва идоралар учун вақтинчалик бинолар аллақачон фойдаланишга топширилган.

Президентга ҳудудни янада ривожлантириш режалари ҳам тақдим этилди. Аукционлар якунига кўра, 13 та тижорат йўналишида 554 миллион АҚШ доллари миқдорида инвестиция шартномалари имзоланди. Бу лойиҳалар доирасида меҳмонхоналар, ресторанлар ва жамоат объектлари қурилиши назарда тутилган.

Қурилиш босқичида тахминан 160 минг иш ўрни яратилиши кутилмоқда. Кейинчалик Янги Тошкентда таълим, соғлиқни сақлаш ва инновация инфратузилмаси, жумладан IT соҳаси ва технопарклар ривожлантирилади.

Давлат раҳбари ташриф давомида инвестиция жалб этиш, шаҳар муҳитини шакллантириш ва жамоат хизматлари инфратузилмасини ривожлантириш масалалари бўйича тавсиялар берди.

Ўзбекистон

21.08.2025, 09:56

Улашиш:

#президент

мавзуга оид янгиликлар