Педофиллар умрбод озодликдан маҳрум қилинади — Президент фармони

Жиноят кодексига киритилган ўзгартишларга кўра, вояга етмаганларга нисбатан жинсий эркинликка қарши жиноятлар, шунингдек улар билан жинсий алоқа қилиш ва уятсиз-бузуқ ҳаракатлар содир этгани учун муқаддам судланган шахслар қуйидаги жиноятларни қайта содир этган тақдирда уларга умрбод ёки узоқ муддатли озодликдан маҳрум қилиш жазоси тайинланади:

— ўн тўрт ёшга тўлмаган шахснинг номусига тегиш;
— ўн тўрт ёшга тўлмаган шахсга нисбатан жинсий эҳтиёжни зўрлик ишлатиб ғайритабиий усулда қондириш;
— ўн олти ёшга тўлмаган шахсга нисбатан уятсиз-бузуқ ҳаракатларни бир гуруҳ шахслар томонидан содир этиш.

Шунингдек, тергов ва суд амалиётидан келиб чиққан ҳолда Жиноят кодексининг 129-моддаси диспозициясига аниқлик киритилди.

Мазкур норма вояга етмаганларни ҳимоя қилишга қаратилган қатъий ҳуқуқий чора ҳисобланади. Аввал ҳам судланган шахсларга нисбатан умрбод ёки узоқ муддатли жазонинг жорий этилиши жазонинг муқаррарлигини таъминлашга ҳамда бундай жиноятларнинг олдини олишга хизмат қилади.