Қирғизистон Президенти ўзбекистонлик мураббийга машина совға қилди

Қайд этилишича, Жапаров Париж-2024 Олимпиадасида қирғизистонлик боксчи Мунарбек Сейитбек ўғлига ўзбекистонлик бокс бўйича мураббий Акмал Хасанов секунддандлик қилгани учун автомобиль совға қилган. Шунингдек, давлат раҳбари унинг бу ҳаракати Қирғизистон ва Ўзбекистон халқлари ўртасидаги дўстлик ва бирликни юксалтирганини билдирган.

"Дунё Марказий Осиё халқларининг ўзаро бирдамлигини, дўстлигини ва бир-бирига яқинлигини кўрди. Спорт тинчлик элчиси дейилади. Сизларнинг бу ҳаракатингиз ўзаро ҳамжиҳатликни мустаҳкамлашга ҳисса қўшмоқда. Келгусида ҳам бирдамлигингиз мустаҳкам бўлсин," дейди Жапаров

Бундан ташқари, Президент Париждаги Олимпия ўйинларида ўзбекистонлик спортчиларининг яхши натижаларни қайд этганига ҳам тўхталди.

"Ўзбекистон спортга алоҳида эътибор қаратди. Биз эса фақат сўнгги уч йил ичида спортчиларимизни фаол равишда қўллаб-қувватлашни бошладик. Олдин мусобақаларга қатнашиш учун маблағни ўз вақтида бера олмай қолган ҳолатларимиз ҳам бўлган. Ҳозирда спўртга алоҳида эътибор қаратиб, спорт учун барча зарур шарт-шароитларни яратмоқдамиз" дейди Қирғизистон раҳбари.

Шунингдек, у Мунарбек Сейитбек ўғлини Олимпия ўйинларида кумуш медални қўлга киритишида Акмал Хасановнинг роли катталигини билдирган.

"Бизнинг аждодларимиз қадим замонларда қаҳрамонларига от тақдим этган. Ҳозирда автомобиллар бериш анъанасига айланган, аммо анъананинг маъноси ўзгаришсиз қолмоқда — бу ўзига хос хизмат учун ҳурмат ва миннатдорчилик ифодаси," деб қўшимча қилган Жапаров.

Акмал Хасанов Қирғизистон раҳбарининг эътибори учун миннатдорлигини билдириб, Мунарбек Сейитбек ўғли билан спорт йиғинларида кўп учрашганини ва унинг секунданти бўлишга ҳеч иккиланмасдан рози бўлганини айтган.