Самарқанддаги халқаро фестивалда 7 тонна палов пиширилади

2025 йилнинг 1-3 август кунлари Самарқандда ўзбек ошхонасини оммалаштириш ва маданий алоқаларни мустаҳкамлашга қаратилган биринчи халқаро “Самарқанд палови” фестивали бўлиб ўтади. Бутун дунёга катта пазандалик шоуси кўринишида тақдим этиладиган миллий таом – Самарқанд паловига алоҳида эътибор қаратилмоқда.

Фестивалнинг асосий воқеаси 200 дан ортиқ ошпаз иштирокида 7 тонна паловнинг тайёрланиши бўлади. Бу воқеа 3 август куни “Абадий шаҳар” сайёҳлик мажмуасида бўлиб ўтади ва ҳақиқий рекордга айланиши кутилмоқда.

Фестивал дастурига қуйидагилар киради:

1 август – Султон Хованд бека (Ашратхона) мақбараси ҳудудида очилиш, ошпазлик танловлари ва маҳаллий рецептлар тақдимоти;

2 август – Алишер Навоий кўчасида хорижий ошпазлар иштирокида халқаро фестивал куни, маҳорат дарслари ва дегустациялар;

3 август – палов тайёрлаш бўйича пазандалик рекорди ва хайрия тадбири.

Уч кун давомида меҳмонлар ҳунармандчилик ярмаркалари, шарқона ширинликлар кўргазмалари, маданий тадбир ва концерт дастурларини томоша қилишади. Тайёрланган палов Меҳрибонлик уйлари, мактаб-интернатлар ва қариялар уйларига топширилади.

Самарқанд палови фестивали минтақанинг ташриф қоғози ва Ўзбекистон учун янги гастрономик брендга айланиши мўлжалланган.