updated: 22.03.2026, 16:10

Мирзиёев ЮНЕСКОнинг 43-сессиясида қатор халқаро ташаббусларни илгари сурди

30 октябр куни Самарқанд шаҳрида бўлиб ўтаётган ЮНЕСКОнинг Таълим, фан ва маданият масалалари бўйича 43-сессиясида Ўзбекистон президенти Шавкат Мирзиёев ўз чиқишида таълим, фан, маданият ва инсон салоҳиятини ривожлантиришга қаратилган қатор халқаро ташаббусларни илгари сурди.

Сиёсат

31.10.2025, 10:13

Lotinchada

Улашиш:

Мирзиёев ЮНЕСКОнинг 43-сессиясида қатор халқаро ташаббусларни илгари сурди

Президент таълим соҳасида махсус эҳтиёжга эга болалар учун ЮНЕСКО инклюзив таълим платформасини яратиш, касбий таълим бўйича Бутунжахон саммитини ўтказиш ҳамда «Сунъий интеллект – мактаб» номли пилот лойиҳани амалга оширишни таклиф этди. Шунингдек, сунъий интеллект этикаси бўйича халқаро экспертлар форумини ташкил этиш ташаббуси ҳам билдирилди.

Маданий мерос ва рақамли йўналишда президент 19-ноябрни Халқаро ҳужжатли мерос куни сифатида эълон қилиш, ЮНЕСКО тизимида Рақамли мерос халқаро институтини ташкил этиш, ҳамда 2027-йилда Бухоро шаҳрида ҳунармандчилик ва халқ ижоди бўйича халқаро конгресс ўтказишни таклиф қилди.

Шавкат Мирзиёев аёллар фаоллигини қўллаб-қувватлаш мақсадида ЮНЕСКО Аёллар лидерлиги академиясини ташкил этиш ва Самарқандда таълим, фан ва маданият соҳасида фаол аёллар иштирокида Глобал аёллар форумини ўтказиш ташаббусларини илгари сурди.

Иқлим ўзгариши ва экологик муаммолар юзасидан давлат раҳбари «ЮНЕСКО экологик пойтахти» халқаро ташаббусини йўлга қўйиш, маданий меросни иқлим ўзгариши шароитида асраш бўйича резолюция ишлаб чиқиш, ҳамда Хива шаҳрида халқаро симпозиум ўтказиш таклифларини билдирди.

Ахборот хавфсизлиги масаласига ҳам тўхталар экан, президент ёлғон ахборот тарқалишига қарши курашиш, жамоатчилик фикрини ҳимоя қилиш, болалар маданий контенти бўйича халқаро фестиваль ташкил этиш, ҳамда медиа саводхонликни ривожлантириш бўйича комплекс стратегия ишлаб чиқиш ташаббусларини илгари сурди.

Шавкат Мирзиёев нутқи якунида Ўзбекистонни маданиятлараро мулоқот, инновацион таълим ва инсон қадриятларини ривожлантириш марказига айлантиришга интилаётганини таъкидлади.