“Ҳар бирингизга $5000 дан бераман” – Трампдан янги ваъда

АҚШ президенти Дональд Трамп Республикачилар 2026 йил ноябридаги оралиқ сайловларда Вакиллар палатаси ва Сенат устидан назоратни сақлаб қолса, мамлакатдаги ҳар бир катта ёшли фуқарога $5 мингдан тўлашини айтди. У бу тўловни “Trump Dividend” деб атади.

Трамп 9 сентябрь куни Далласда ўтказилган Республикачилар партиясининг оралиқ сайловлар бўйича анжуманида мазкур тўловни муваффақиятли компанияларнинг акциядорларига дивиденд тарқатишига қиёслади.

Дастур қанчага тушади?

АҚШда қарийб 270 миллион вояга етган киши бор. Уларнинг ҳар бирига $5 мингдан тўлаш умумий ҳисобда тахминан $1,35 триллион талаб қилиши мумкин.

Бироқ бу ҳозирча аниқ амалга ошириладиган давлат дастури эмас. Уни жорий этиш учун Конгресснинг қонунчилик орқали розилиги талаб қилинади. Трамп нутқида дастурнинг ҳуқуқий ва техник механизмлари бўйича батафсил режа тақдим этмаган.

Пул қаердан олинади?

Трамп тўловларни қисман ёки тўлиқ тарифлардан тушадиган даромад ҳисобидан молиялаштириш мумкинлигини айтган. Бироқ ҳозирги тариф тушумлари $1 триллиондан ортиқ дастур харажатини қоплашга етмайди.

Вице-президент Жей Ди Венс кейинчалик дастур даромади юқори америкаликларни четлаб ўтиши мумкинлигини билдирди. Бу эса Трампнинг дастлабки баёнотида айтилган “ҳар бир вояга етган америкалик” иборасига зид.

Хуллас, $5 минглик “Trump Dividend” ҳозирча президентнинг сайловолди ваъдаси бўлиб, унинг якуний шакли, кимларга берилиши ва қандай молиялаштирилиши Конгрессдаги келишувларга боғлиқ.