Трамп Европа давлатларига 100 фоизлик бож билан таҳдид қилмоқда

Доналд Трамп АҚШ технология гигантлари учун рақамли хизматлар солиғини жорий қиладиган Европа давлатига 100 фоизлик импорт божини қўллашини билдирди. Бу ҳақда BBC маълумот берди.

Трамп “Truth Social” платформасида ёзишича, кўплаб Европа мамлакатлари бундай йиғимни жорий этишни муҳокама қилмоқда, баъзилари эса бунга яқин турибди.

У жазо чоралари зудлик билан қўлланилишидан ва мавжуд ҳар қандай икки томонлама савдо шартномалари бутунлай бекор қилинишидан огоҳлантирди.

Баёнот янги йиғимларни тез орада жорий этишни режалаштираётган давлатларга қаратилган. Лондон бундай солиқни 2020 йилдаёқ амалга киритганини ҳисобга олсак, унинг Буюк Британия учун аниқ оқибатлари дарҳол аён бўлмади.

“Ушбу баёнот шуни англатсинки, бундай солиқни жорий қилган ҳар қандай давлатнинг Америка Қўшма Штатларига юборадиган барча товарларига зудлик билан 100 фоизлик ТАРИФ жорий этилади”, — деб ёзди у.

Британияда аллақачон солиқ бор

Буюк Британиянинг 2 фоизлик Рақамли хизматлар солиғи рақамли бизнесдан оладиган глобал даромади 500 миллион фунт стерлингдан, Буюк Британиядаги умумий даромади эса 25 миллион фунт стерлингдан ошадиган йирик қидирув тизимлари, ижтимоий тармоқ платформалари ва онлайн бозорларга (маркетплейслар) нисбатан қўлланади.

Бу ҳолат АҚШнинг Apple, Google, Meta ва Amazon каби йирик компанияларига таъсир кўрсатади. Буюк Британия Ғазначилиги маълумотларига кўра, ушбу солиқ 2024–2025 йилларга келиб 800 миллион фунт стерлингдан ортиқ даромад келтирган. Бу кўрсаткич 2023–2024 йиллардаги 678 миллион фунт стерлингга нисбатан сезиларли даражада юқори.

Европадаги вазият 

Трампнинг шундай солиқни жорий этишни режалаштираётган Европа давлатларига жавоб чоралари билан таҳдид қилиши АҚШ ва Европа Иттифоқи янги савдо битимини якунлаганидан бир неча кун ўтиб юз берди.

Солиқ сиёсати билан шуғулланувчи “Тах Foundation” нотижорат ташкилотининг маълумотларига кўра, Франция, Италия ва Испания ҳам ўз ҳудудида фаолият юритувчи йирик компанияларга 3 фоизлик рақамли хизматлар солиғини жорий қилган.

Европа Иттифоқининг яна бир қанча давлатлари ҳам шунга ўхшаш солиқни амалиётга татбиқ этган ёки таклиф билдирилган.

Жорий йил бошида Amazon айнан шундай солиқларни сабаб қилиб, сотувчилардан олинадиган тўловларни оширган эди.

Трампнинг тарифлар сиёсати

Трамп 2025 йилда қайта президент бўлганидан буён кўплаб мамлакатларга юқори тарифлар жорий этишга уринмоқда.

Февраль ойида АҚШ Олий суди Трампнинг 10 фоизлик глобал бож жорий этишга қаратилган аввалги уринишини бекор қилди.

Шундай бўлса-да, АҚШ яқинда ўзининг деярли бутун импорт ҳажмини таъминлайдиган ўнлаб давлатларга уларни мажбурий меҳнатга қарши етарлича курашмаётганликда айблаб, 10-12,5 фоизлик янги тарифлар жорий этди.