“Har biringizga $5000 dan beraman” – Trampdan yangi va’da

AQSH prezidenti Donald Tramp Respublikachilar 2026-yil noyabridagi oraliq saylovlarda Vakillar palatasi va Senat ustidan nazoratni saqlab qolsa, mamlakatdagi har bir katta yoshli fuqaroga $5 mingdan to‘lashini aytdi. U bu to‘lovni “Trump Dividend” deb atadi.

Tramp 9-sentabr kuni Dallasda o‘tkazilgan Respublikachilar partiyasining oraliq saylovlar bo‘yicha anjumanida mazkur to‘lovni muvaffaqiyatli kompaniyalarning aksiyadorlariga dividend tarqatishiga qiyosladi.

Dastur qanchaga tushadi?

AQSHda qariyb 270 million voyaga yetgan kishi bor. Ularning har biriga $5 mingdan to‘lash umumiy hisobda taxminan $1,35 trillion talab qilishi mumkin. 

Biroq bu hozircha aniq amalga oshiriladigan davlat dasturi emas. Uni joriy etish uchun Kongressning qonunchilik orqali roziligi talab qilinadi. Tramp nutqida dasturning huquqiy va texnik mexanizmlari bo‘yicha batafsil reja taqdim etmagan.

Pul qayerdan olinadi?

Tramp to‘lovlarni qisman yoki to‘liq tariflardan tushadigan daromad hisobidan moliyalashtirish mumkinligini aytgan. Biroq hozirgi tarif tushumlari $1 trilliondan ortiq dastur xarajatini qoplashga yetmaydi.

Vitse-prezident J.D. Vens keyinchalik dastur daromadi yuqori amerikaliklarni chetlab o‘tishi mumkinligini bildirdi. Bu esa Trampning dastlabki bayonotida aytilgan “har bir voyaga yetgan amerikalik” iborasiga zid.

Xullas, $5 minglik “Trump Dividend” hozircha prezidentning saylovoldi va’dasi bo‘lib, uning yakuniy shakli, kimlarga berilishi va qanday moliyalashtirilishi Kongressdagi kelishuvlarga bog‘liq.