Ратко Младич Гаагадаги қамоқхонада вафот этди

Ратко Младичнинг вафот этганини унинг ўғли Дарко Младич тасдиқлади. Бу маълумотни Reuters ҳам БМТ расмийсига таяниб тасдиқлаган. 

Ратко Младич ким эди?

Младич 1992–1995 йиллардаги Босния уруши даврида Босния серблари Республикаси армияси Бош штабига раҳбарлик қилган. У 2011 йилда Сербияда, 16 йилдан ортиқ вақт давомида қидирувда бўлганидан сўнг қўлга олинган. 

2017 йилда собиқ Югославия бўйича Халқаро трибунал уни геноцид, инсониятга қарши жиноятлар ва уруш қонунларини бузишда айбдор деб топиб, умрбод қамоқ жазосига ҳукм қилган. Ҳукм 2022 йилда якуний кучга кирган. 

Сребреница қирғини

Младич 1995 йилда Сребреницада содир этилган қотилликлар учун ҳам жавобгар деб топилган. У ерда 8 мингдан ортиқ босниялик мусулмон эркак ва ўғил болалар ўлдирилган. Сребреница воқеаси Иккинчи жаҳон урушидан кейин Европадаги энг оғир оммавий қотилликлардан бири сифатида қайд этилган. 

Сўнгги йилларда соғлиғи ёмонлашган

Младич сўнгги йилларда жиддий соғлиқ муаммоларига дуч келган. У бир неча марта инсультни бошдан кечирган ва 2024 йилдан бери Гаагадаги қамоқхона шифохонасида даволанган. Оиласи уни гуманитар асосларда Сербияга даволаниш учун вақтинча юборишни сўраган, аммо бу талаб қаноатлантирилмаган. 

Ратко Младич 27 август куни 84 ёшида Гаагада вафот этди.