Россия ташқи ишлар вазири ўринбосари Сергей Рябков 21-август куни News.ru нашрига берган интервьюсида АҚШ «конструктив мулоқот»га ва «Россия позициясини тушуниш»га тайёрлигини намоён этганини билдирди.

«Вашингтон Россиянинг стратегик мағлубиятини ҳали ҳам орзу қилаётган Киев ва унинг европалик ҳомийлари қарорларига қанчалик таъсир ўтказа олади – ҳозир шуниси муҳим», — деди у нашрга.

Эрон уруши фонида Россия ва АҚШ ўртасида Украинадаги можарони тугатиш бўйича музокаралар тўхтаб қолди.

Кремль 20-август куни Россия билан аввал музокаралар олиб борган АҚШ вакиллари Жаред Кушнер ва Стив Уиткоффнинг Москвага яна қачон ташриф буюриши ҳақида аниқ маълумот йўқлигини маълум қилди.

Рябковнинг сўзларига кўра, Россия Вашингтон билан мулоқотни давом эттиришга тайёр.

«Россия Федерацияси президент томонидан қўйилган мақсадларга мос келадиган ҳамда “мавжуд воқелик”ка мувофиқ бўлган ҳар қандай оқилона таклиф ва ғояларни тинглашга тайёр», – деди у.

Деярли 4,5 йиллик урушдан сўнг Россия Украинанинг халқаро миқёсда тан олинган ҳудудларининг тахминан бешдан бир қисмини назорат қилмоқда.

Ядровий музокаралар

Рябков интервьюда Россия АҚШ билан ядро қуроли бўйича муҳокамаларни давом эттиришдан манфаатдор эканини ҳам айтиб ўтди.

«Янги START» ядровий шартномасининг амал қилиш муддати февраль ойида тугаган бўлиб, бунинг натижасида дунёнинг гигант икки ядровий давлати ярим асрдан кўпроқ вақт мобайнида илк бор стратегик арсеналларига нисбатан ҳеч қандай чекловларсиз қолди.

Москва, Вашингтон ҳам шундай йўл тутса, шартномадаги ракета ва жанговар каллаклар бўйича чекловларга риоя қилишда давом этишини маълум қилди.