“Ядровий қурол жаҳон урушига қарши ягона кафолатдир” — Кремль

Давлатлар ўртасида янги қуролланиш пойгаси борасидаги хавотирлар фонида Кремль ядровий қурол дунёни глобал урушга ғарқ бўлишдан сақлаб турувчи “ягона” қалқон эканини таъкидлади.

Россия ва АҚШ ўртасидаги ядровий қуролларни назорат қилиш бўйича сўнгги шартнома — “Янги START”нинг амал қилиш муддати февраль ойида тугади.

Томонлар юқори даражадаги ҳарбий музокараларни қайта тиклашга келишиб олган бўлса-да, ҳозирча ҳеч бир тараф шартномани янгилаш ёки бошқаси билан алмаштиришга ҳаракат қилаётгани йўқ.

Москвадаги ташқи сиёсат форумида сўзга чиққан Кремль матбуот котиби Дмитрий Песков глобал хавфсизлик тизими “емирилаётганини” таъкидлади.

“Аслида, бизда ядровий тийиб туришдан бошқа ҳеч нарса қолмади. Дунёни глобал урушдан ҳимоя қиладиган ягона нарса ҳам шу”, – деди Песков.

“Технологиялар ривожланар экан, ядровий бўлмаган қуролларнинг янги турлари пайдо бўлиши аллақачон аён. Аммо улар охир-оқибат ўзининг вайронкор кучи билан ядровий қуролларга тенглашиши мумкин”, – дея қўшимча қилди у.

Россия президенти Владимир Путин Украинадаги тўрт йиллик босқини давомида ядровий риторикадан бир неча бор фойдаланди. Буни Европа ва АҚШ бепарволик билан қурол ўйнатишга йўйди.

Доналд Трамп ядровий салоҳияти ўсиб бораётган, бироқ ҳамон Россия ёки Қўшма Штатларникидан анча кичик бўлган Хитойни ҳам янги шартномага киритишга ундади.

Ушбу босимни очиқчасига рад этди Пекин.

Москванинг таъкидлашича, агар Хитой янги келишувга қўшилса, у ҳолда Вашингтоннинг ядровий иттифоқчилари ҳисобланмиш Буюк Британия ва Франция ҳам киритилиши керак.

“Янги START” шартномасининг муддати тугаши билан дунё сўнгги ўн йилликларда илк бор ядровий қуролларни жойлаштиришни чекловчи амалдаги келишувсиз қолди.

2010 йилда имзоланган ушбу битим “Совуқ уруш” давридаги қуролларни назорат қилиш бўйича бир қатор келишувларнинг сўнггиси бўлиб, Москва ва Вашингтоннинг ҳар бирига 1550 тадан ортиқ жанговар каллак жойлаштиришни тақиқлаган эди.

Шартнома муддати тугашидан аввал ҳар икки давлат бир-бирини келишувга риоя қилмасликда бир неча бор айблаган.