Россия Украина урушини якунлаш бўйича Трампдан янги таклифлар кутади — Песков

Россия АҚШ президенти Доналд Трампнинг Украинадаги урушни якунлаш бўйича саъй-ҳаракатларини самимий деб ҳисоблайди ва Вашингтоннинг янги таклифларини кутишга тайёр. АҚШ Киевга қурол-яроғ етказиб беришда давом этаётган бир пайтда Москва ўз мақсадларига ҳарбий йўл билан эришишни давом эттиришини маълум қилди Дмитрий Песков.

“Албатта, жанговар ҳаракатлар афзал йўл эмас. Бироқ тинчлик истиқболлари кўринмаётгани сабабли биз бу ишни охиригача, мутлақ ғалабагача давом эттирамиз. Шунингдек, АҚШдан янги таклифлар ҳам кутиб қоламиз”, — деди Песков.

Унинг таъкидлашича, Кремль Доналд Трамп маъмурияти билан дипломатик мулоқотни давом эттириш тарафдори. 

“Президент Трамп ва унинг музокарачилари ҳаммага мақбул келадиган ечимларни ишлаб чиқишга интилмоқда. Улар таклиф қилган вариантни биз қабул қилдик, аммо Украина рад этди”, — деди у.

Россия, Украина ва АҚШ ўртасидаги сўнгги уч томонлама тинчлик музокаралари февраль ойида бўлиб ўтган эди. Кремль Яқин Шарқдаги вазият барқарорлашгач, Вашингтон воситачилигидаги музокаралар қайта тикланишидан умидвор эканини бир неча бор билдирган.

Шунингдек, ушбу ҳафта АҚШ ва Россиянинг юқори мартабали дипломатлари Осиёда қисқа учрашув ўтказди. Москва бир неча ҳафтадан буён Доналд Трампнинг махсус вакилларини музокаралар учун қабул қилишга тайёрлигини билдираётган бўлса-да, учрашув санаси ҳозирча эълон қилинмаган.

“Иккиёқлама” позиция

Песков АҚШнинг позициясини “иккиёқлама” деб баҳолаб, Вашингтон бир томондан урушни тугатиш истагини билдираётган бўлса, иккинчи томондан Украинага қурол етказиб беришни давом эттираётганини қайд этди.

“Шунга қарамай, Трамп маъмуриятининг бу иккиёқлама позициясидан манфаатларимизга мос келадиган ўринларда фойдаланишимиз керак. Уларнинг тинч йўл билан ечим топишга бўлган интилиши эса бизнинг манфаатларимизга ҳам мос келади”, — деди Кремль вакили.