Rossiya tinchlik bo‘yicha yangi takliflarni eshitishga tayyor — rossiyalik rasmiy

Rossiya tashqi ishlar vaziri o‘rinbosari Sergey Ryabkov 21-avgust kuni News.ru nashriga bergan intervyusida AQSH “konstruktiv muloqot”ga va “Rossiya pozitsiyasini tushunish”ga tayyorligini namoyon etganini bildirdi.

“Vashington Rossiyaning strategik mag‘lubiyatini hamon orzu qilayotgan Kiyev va uning yevropalik homiylari qarorlariga qanchalik ta’sir o‘tkaza oladi – hozir shunisi muhim”, — dedi u nashrga.

Eron urushi fonida Rossiya va AQSH o‘rtasida Ukrainadagi mojaroni tugatish bo‘yicha muzokaralar to‘xtab qoldi.

Kreml 20-avgust kuni Rossiya bilan avval muzokaralar olib borgan AQSH vakillari Jared Kushner va Stiv Uitkoffning Moskvaga yana qachon tashrif buyurishi haqida aniq ma’lumot yo‘qligini ma’lum qildi.

Ryabkovning so‘zlariga ko‘ra, Rossiya Vashington bilan muloqotni davom ettirishga tayyor.

“Rossiya Federatsiyasi prezident tomonidan qo‘yilgan maqsadlarga mos keladigan hamda “mavjud voqelik”ka muvofiq bo‘lgan har qanday oqilona taklif va g‘oyalarni tinglashga tayyor”, – dedi u.

Deyarli 4,5 yillik urushdan so‘ng Rossiya Ukrainaning xalqaro miqyosda tan olingan hududlarining taxminan beshdan bir qismini nazorat qilmoqda.

Yadroviy muzokaralar

Ryabkov intervyuda Rossiya AQSh bilan yadro quroli bo‘yicha muhokamalarni davom ettirishdan manfaatdor ekanini ham aytib o‘tdi.

“Yangi START” yadroviy shartnomasining amal qilish muddati fevral oyida tugagan bo‘lib, buning natijasida dunyoning gigant ikki yadroviy davlati yarim asrdan ko‘proq vaqt mobaynida ilk bor strategik arsenallariga nisbatan hech qanday cheklovlarsiz qoldi.

Moskva, Vashington ham shunday yo‘l tutsa, shartnomadagi raketa va jangovar kallaklar bo‘yicha cheklovlarga rioya qilishda davom etishini ma’lum qildi.