Rossiya Yevropa bilan muzokaralarga tayyor – Dmitriy Peskov

Kreml matbuot kotibi Dmitriy Peskovning so‘zlariga ko‘ra, kun tartibida bir talay murakkab masalalar borligi hisobga olinsa, sog‘lom fikr muzokaralarni taqozo etadi. Biroq yevropaliklar Rossiyaga nisbatan o‘z yondashuvini o‘zgartirishi lozim.

“Yevropaliklar yanglish qarashga ega: ular Rossiya bilan muzokaralar kuchli pozitsiyadan va Rossiyaning zaifligiga tayanib olib borilishi kerak, deb hisoblaydi. Bu – eng katta xato... Bunday gaplar bilan biron narsaga erishish mahol”, – dedi u jurnalistlarga.

Putin Yevropa hukumatlari bilan muzokaralarga ochiqligini, biroq birinchi qadamni ular qo‘yishi kerakligini, chunki aloqalarni aynan ular uzganini ta’kidlagan. Yevropa Ittifoqi Ukrainaga bostirib kirgani sababli Rossiyaga qarshi 20 bosqichli sanksiyalar joriy etgan.

Yevropa pozitsiyasining o‘zgarishi

Bir yildan oshiq vaqt davomida chetda turib, ziddiyatga barham berish vositachiligini AQSh prezidenti Donald Trampga qo‘yib bergan Yevropa Ittifoqi Rossiya bilan aloqa o‘rnatishni ehtiyotkorona tarzda boshladi.

Yevropa Kengashi raisi Antonio Koshtaning idorasi so‘nggi haftalarda aloqa kanallarini ochish maqsadida Kreml bilan diplomatik darajada qisqa muloqotlar o‘tkazgan.

Avstriya kansleri Kristian Shtoker “Financial Times” nashriga bergan intervyusida Yevropa Ittifoqi Putin bilan muzokaralarni qayta boshlash uchun Ukrainadagi tinchlik muzokaralari atrofidagi “qulay vaziyat”dan foydalanishi kerakligini aytdi.

Peskovning so‘zlariga ko‘ra, agar qarshi taraf haqiqiy muloqotga kirishmoqchi bo‘lsa, Rossiya muzokara o‘tkazishga tayyor, biroq bu pand-nasihat qilish yoki ultimatum qo‘yish uchun bo‘lmasligi kerak.

Moskvaga dron zarbalari berildi

Ukraina Rossiya ichkarisidagi portlar, neftni qayta ishlash zavodlari va boshqa muhim infratuzilmalarga bergan dron zarbalari tufayli urushdagi vaziyat o‘zgartirayotganini aytmoqda. Moskva esa buni rad etib, agar diplomatik kelishuvga erishilmasa, maqsadlariga yetish uchun kurashni davom ettirishini ta’kidlamoqda.

Moskva viloyati gubernatorining ma’lum qilishicha, 18-iyun kuni poytaxt va uning atrofidagi hududlarga qilingan keng ko‘lamli Ukraina hujumida sakkiz yoshli qizaloq halok bo‘lgan.

Neftni qayta ishlash zavodining yonayotgan tasvirlari Putinga ko‘rsatilgan-ko‘rsatilmagani haqidagi savolga javoban Rossiya kuchlari zarba bergan Ukraina shaharlarini ko‘rishni tavsiya qildi Peskov. “Bu zarbalar davom etadi”, — dedi u.