Қозоғистон президенти Украинадаги урушни музлатишга чақирди

Қозоғистон президенти Қосим-Жомарт Тўқаев 25 июл куни томонлар можарони музлатиб, музокараларни қайта бошласа, Россия ва Украина ўртасидаги тинчлик келишувига эришиш мумкинлигини айтди.

Сибирнинг Омск шаҳрида ўтган Россия–Қозоғистон форумида Россия президенти Владимир Путин билан бирга сўзга чиққан Тўқаев Путиннинг “дипломатик мослашувчанлиги”ни юқори баҳолади.

“Мендан сўралгани учун камтарона фикримни билдирадиган бўлсам, бу можарони музлатиб, Истанбул формуласининг 2.0 талқинига қайтиш вақти келди-ёв”, — деди у.

Москва ва Киев 2022-йил бошида Россиянинг босқинидан кўп ўтмай Истанбулда музокараларда қатнашган, бироқ улар ютуқсиз якунланган.

“Гигант давлатларнинг, жумладан, Россиянинг (хавфсизлик) кафолатлари берилса, биз узоқ кутилган тинчлик сари олға силжишимиз мумкин. Можарога албатта чек қўйиш керак”, — деди Тўқаев.

ТАСС давлат ахборот агентлиги Кремль матбуот котиби Дмитрий Песковга таяниб ёзишича, Путин Тўқаевга Россиянинг Украинадаги ҳарбий амалиётларининг ҳозирги ҳолати ҳақида батафсил маълумот берган.

Песковга кўра, Кремль раҳбари Киевнинг позициясини инобатга олганда, можаронинг ўзини музлатиб қўйиш имконсизлигини ва агар Киев тегишли қарорларни қабул қилса, ҳарбий ҳаракатлар бугуноқ тўхташини айтган.

Путин нима истайди?

Ўтган ой Путин Россиянинг Украина билан тинчлик битимини имзолаш бўйича позицияси ўзгаришсиз қолаётганини таъкидлади.

Унга кўра, Украина Москва ўзиники деб даъво қилаётган тўртта ҳудуддан қўшинларини олиб чиқиб кетиши ва НАТОга қўшилиш режаларидан воз кечиши шарт.