“Мамлакат уни қаҳрамондек қабул қилди” — Роналдунинг Тошкентга ташрифи

Ўзбекистон миллий терма жамоасининг Португалияга қарши баҳси ўзбек футболи тарихига унутилмас рамзий саҳифа бўлиб муҳрланди.

2009 йилда жаҳон футболи юлдузи Криштиану Роналду Тошкентга ташрифи доирасида пойтахтдаги футбол академияси тарбияланувчилари билан учрашган. 

Тасодифни қарангки, ўшанда афсонанинг қошида ҳаяжон билан турган ўсмирлар орасида ҳозирги миллий терма жамоамиз етакчилари — Рустам Ашурматов ва Достонбек Ҳамдамов ҳам бор эди.

Роналдунинг Ўзбекистонга келиши маҳаллий футбол ривожига ҳамда ёшларда катта интилишлар уйғонишига туртки берган. Ҳимоячи Рустам Ашурматов ўша тарихий лаҳзаларнинг таъсирини шундай хотирлайди:

“Ўзбек футболи Криштиану Роналдунинг мамлакатимизга ташрифи билан қайта туғилгандек бўлди. Бутун мамлакат уни қаҳрамондек қабул қилди. Биз ҳам шу руҳда катта бўлдик. Аммо майдонда у менинг кумирим эмас, рақибим бўлади”.

Орадан 17 йил ўтиб, ўшанда Роналдунинг ёнида ҳавас билан турган 13 ёшли болакайлар Жаҳон чемпионати аренасида 41 ёшли афсонага қарши мардона майдонга тушишди. 

Бир пайтлар орзу бўлган нарса бугун яшил майдонда ҳақиқатга айланди!