“Mamlakat uni qahramondek qabul qildi” — Ronalduning Toshkentga tashrifi

O‘zbekiston milliy terma jamoasining Portugaliyaga qarshi bahsi o‘zbek futboli tarixiga unutilmas ramziy sahifa bo‘lib muhrlandi.

2009-yilda jahon futboli yulduzi Krishtianu Ronaldu Toshkentga tashrifi doirasida poytaxtdagi futbol akademiyasi tarbiyalanuvchilari bilan uchrashgan. 

Tasodifni qarangki, o‘shanda afsonaning qoshida hayajon bilan turgan o‘smirlar orasida hozirgi milliy terma jamoamiz yetakchilari — Rustam Ashurmatov va Dostonbek Hamdamov ham bor edi.

Ronalduning O‘zbekistonga kelishi mahalliy futbol rivojiga hamda yoshlarda katta intilishlar uyg‘onishiga turtki bergan. 

Himoyachi Rustam Ashurmatov o‘sha tarixiy lahzalarning ta’sirini shunday xotirlaydi:

“O‘zbek futboli Krishtianu Ronalduning mamlakatimizga tashrifi bilan qayta tug‘ilgandek bo‘ldi. Butun mamlakat uni qahramondek qabul qildi. Biz ham shu ruhda katta bo‘ldik. Ammo maydonda u mening kumirim emas, raqibim bo‘ladi”.

Oradan 17 yil o‘tib, o‘shanda Ronalduning yonida havas bilan turgan 13 yoshli bolakaylar Jahon chempionati arenasida 41 yoshli afsonaga qarshi mardona maydonga tushishdi. 

Bir paytlar orzu bo‘lgan narsa bugun yashil maydonda haqiqatga aylandi!