«Ал-Наср» «Нефтчи»ни мағлуб этди — Роналду ҳам гол урди

Associated Press (AP) агентлигининг хабар беришича, ўйин бошланишига тахминан 15 дақиқа қолганда Саудия Арабистони Фуқаро мудофааси аҳолига хавфсизлик огоҳлантиришини юборган. Шу сабабли жамоалар майдонга чиқишдан олдин кутишга мажбур бўлган.

Хавфсизлик билан боғлиқ узилишдан кейин учрашув Ар-Риёддаги «Ал-Аввал Парк» стадионида ўтказилди.

Ўйиннинг 33-дақиқасида Анжело Габриэл мезбонларни ҳисобда олдинга олиб чиқди. Биринчи бўлим якунига уч дақиқа қолганда Криштиану Роналду «Ал-Наср»нинг иккинчи голини урди.

Иккинчи бўлимда «Нефтчи» футболчиси Алишер Одилов фарқни қисқартирди. Бироқ 78-дақиқада Нефтчи ҳимоячиси Анваржон Ғофуровнинг ўз дарвозасига киритган тўпи Саудия клубининг 3:1 ҳисобидаги ғалабасини таъминлади.

Муаллиф: Ҳасанбой ОЧУН