Криштиану Роналду 30 кунга футболдан четлатилди

Португалия футбол федерацияси интизом кенгаши Криштиану Роналдуга нисбатан 30 кунлик дисквалификация белгилади. Шунингдек, 41 ёшли футболчи 255 евро — тахминан 285 АҚШ доллари миқдорида жарима тўлайди.

Reuters агентлиги хабар беришича, интизомий чора футболчининг миллий терма жамоа ихтиёридаги йиғинни тарк этгани билан боғлиқ. Ҳодиса Роналду ва жамоа бош мураббийи Жорже Жезуш ўртасида футболчининг асосий таркибдаги ўрни юзасидан келиб чиққан келишмовчиликдан кейин содир бўлган.

Роналду Норвегияга қарши учрашувда захирада қолдирилиб, майдонга туширилмаганидан норози бўлган. Унинг таъкидлашича, мураббий ўйиндаги иштироки борасидаги ваъдаларини икки марта бажармаган. Шундан сўнг футболчи Португалия терма жамоасининг Копенгагендаги йиғинини Данияга қарши Миллатлар лигаси ўйини олдидан тарк этган.

Жорже Жезуш эса Роналду билан бундай келишув бўлганини рад этган. Бироқ у футболчининг терма жамоага қайтиши учун имконият сақланиб қолишини билдирган.

Португалия футбол федерацияси интизом кенгаши футболчининг ҳаракатини интизом қоидаларининг 160-моддаси 1-бандига зид деб топди. Иш бўйича расмий жараён 9 октябрда бошланган.

Ҳозирча дисквалификация айнан қайси учрашувлар ёки фаолият турларига татбиқ этилиши ва вақтинчалик четлатиш даври якуний жазо муддатига қўшиб ҳисобланиши расман аниқлаштирилмаган.

Роналду кейинчалик мухлислар ва жамоадошларидан узр сўраб, белгиланган жазони қабул қилишга тайёрлигини билдирган. Португалия футбол федерацияси президенти Педру Проэнса ҳам масала ҳал этилгач, футболчининг терма жамоага қайтишини исташларини айтган.

Муаллиф: Ҳасанбой ОЧУН