«Нефтчи» ҳақидаги баёноти учун Бердиевга нисбатан текширув бошланди

26 октябрь куни бўлиб ўтган «ОКМК» – «Насаф» баҳси (1:1) ортидан Бердиевнинг сўзлари кенг жамоатчиликда қизғин муҳокамаларга сабаб бўлди. У «Нефтчи» клуби ҳақида тўхталар экан, шундай деган:

«Ҳамма “Нефтчи” ҳақида гапиряпти, аммо биз ҳам сукут сақламаймиз. Жамоамиз узоқ вақтдан бери мағлубиятсиз серияни давом эттирмоқда ва чемпионликка муносиб. “Нефтчи”нинг орқада қандай йўл тутаётганини ҳам кўриб турибсиз. Агар улар вазифани бажарса, қаҳрамонлар майдонда эмас, бошқа ерда қидирилишига тўғри келади. Нима демоқчиман, англаб олган бўлсангиз керак».

Шу билан бирга, мураббий «ортдаги одамлар» деганда кимларни назарда тутганини очиқламади.

ЎФА ушбу баёнотни ўрганиб чиқишини ва хулосага кўра ҳуқуқий чоралар белгиланишини билдирди.

Эслатиб ўтамиз, 26-турдан кейин «Нефтчи» 57 очко билан «Насаф»дан устунликка чиқди. Икки жамоа бир хил очко тўплаган бўлса-да, ўзаро ўйинлардаги натижа «Нефтчи» фойдасига (1:0, 1:1). Қолган 4 турда улар очко йўқотмаса, чемпионликни қўлга киритиши мумкин.