Шомуродовнинг дубли: Ўзбекистон Фарғонада Эрон устидан 3:1 ҳисобида енгди

Ҳисоб 10-дақиқада очилди. Эрон ҳимоячиси Эҳсон Ҳожсафий тазйиқ остида ўз ҳудудида хато узатма берди. Тўпни илиб олган терма жамоа сардори Элдор Шомуродов дарҳол зарба йўллади ва меҳмонлар ҳимоячиси тўпни дарвоза чизиғидан қайтара олмади.

Биринчи бўлимда Шомуродов яна гол уриши мумкин эди: Аббосбек Файзуллаевнинг узатмасидан кейин унинг зарбаси штангага тегди. Танаффус олдидан Эрон ягона хавфли ҳужумини уюштирди. Меҳди Таремининг бош билан берган зарбасини «Пахтакор» дарвозабони Владимир Назаров қайтарди.

Иккинчи бўлим бошида меҳмонлар ҳисобни тенглаштирди. 49-дақиқада Рамин Резаиён жарима тўпини майдонча ичига йўллади ва тўп Жаҳонгир Ўрозовга тегиб, Ўзбекистон дарвозасига кириб кетди.

Кўп ўтмай Одилжон Ҳамробековнинг узатмасидан сўнг Беҳруз Каримов тўпга Эрон дарвозабони Алиризо Бейранванддан олдин етиб борди ва бошидан эрон дсраозабони томонидан зарба олди. Россиялик ҳакам Кирилл Левников пенальти белгилади. Каримовга узоқ вақт тиббий ёрдам кўрсатилганидан сўнг Шомуродов 58-дақиқада 11 метрлик жарима тўпини аниқ амалга ошириб, дубль қайд этди.

Якуний ҳисобни қўшимча вақтнинг 4-дақиқасида захирадан чиққан Ҳусайн Норчаев белгилади. Маҳмуд Маҳамаджонов қарама-қарши томон жарима майдонигача тўпни олиб бориб, Норчаевга узатди, у чап оёғи билан аниқ зарба берди.

Бу ғалаба Фабио Каннаваро жамоаси учун жаҳон чемпионатидаги мағлубиятлардан кейин муҳим бўлди. Ўзбекистон мундиалда Колумбияга 1:3, Португалияга 0:5 ва ДР Конгога 1:3 ҳисобида ютқазган эди.

Терма жамоа кейинги ўртоқлик учрашувини 1 октябрь куни Тошкентда Сурия билан ўтказади. 6 октябрь куни эса Жанубий Кореяга қарши ўйин бор. Эрон 29 сентябрь куни Қозонда Россия терма жамоаси билан ўйнайди.