Россия шахматчилари Самарқанддаги Жаҳон шахмат олимпиадасида қатнашмайди

Россия шахмат федерацияси ижрочи директори Александр Ткачёвнинг маълум қилишича, россиялик шахматчилар 2026 йилда Самарқандда ўтказиладиган Жаҳон шахмат олимпиадасида иштирок этмайди.

«Жамоаларимиз Жаҳон шахмат олимпиадасида қатнашмайди. Бундай қарор FIDE президенти вазифасини бажарувчи Вишванатан Ананд ташаббуси билан Президентлик кенгаши томонидан қабул қилинган», — деди Ткачёв TASS ахборот агентлигига.

Маълум қилинишича, FIDE Бош ассамблеяси 2025 йил 14 декабрда россиялик шахматчиларга нисбатан жорий этилган чекловларни тўлиқ ёки қисман бекор қилиш масаласини овозга қўйган. Йиғилишда 61 нафар делегат россиялик спортчиларнинг қайтиши тарафдори бўлган, 51 нафар делегат эса бунга қарши чиққан.

2026 йил 9 январь куни Буюк Британия, Германия, Норвегия, Эстония ва Украина шахмат федерациялари FIDEнинг россиялик шахматчиларга нисбатан санкцияларни тўлиқ бекор қилиш қароридан норози эканини билдирган.

Кейинчалик, 2026 йил июнь ойида россиялик шахматчиларга нисбатан чекловлар қайта тикланган.

Олимпиада Самарқандда ўтказилади

2026 йилги Жаҳон шахмат олимпиадаси 16–27 сентябрь кунлари Самарқанд шаҳрида бўлиб ўтади.

Мусобақада рекорд даражадаги иштирокчилар қатнашиши кутилмоқда. Ташкилотчилар маълумотига кўра, очиқ ва аёллар турнирларида жами 400 та жамоа — 208 та очиқ ва 192 та аёллар жамоаси иштирок этиши режалаштирилган.

Жаҳон шахмат олимпиадаси шахмат бўйича энг нуфузли халқаро жамоавий мусобақалардан бири ҳисобланади.

Россия жамоаларининг мусобақада иштирок этмаслиги эса Самарқанддаги олимпиаданинг энг муҳокама қилинаётган масалаларидан бири бўлиши кутилмоқда.