Тиббиёт олийгоҳларида суперконтракт бекор қилиниши мумкин

Бу ҳақда Соғлиқни сақлаш вазирлиги томонидан жамоатчилик муҳокамасига қўйилган қарор лойиҳасида назарда тутилган.

Лойиҳага кўра, тиббиёт соҳаси учун кадрлар тайёрловчи олий таълим ташкилотларида бакалавриат таълим йўналишларига оширилган тўлов-контракт асосида қабул қилиш тартиби 2026/2027-ўқув йилидан бошлаб бекор қилинади.

Шунингдек, ушбу ўқув йилидан бошлаб тиббиёт ОТМларида “Даволаш иши” ва “Педиатрия иши” бакалавр таълим йўналишлари негизида 5+1 шаклидаги “Умумий тиббиёт” бўйича 6 йиллик таълим йўналиши жорий этилади. Мазкур йўналиш битирувчилари оилавий шифокор мутахассислигига эга бўлади.

2027 йил 1 январдан бошлаб бакалавриат, резидентура (клиник ординатура) ва магистратура мутахассисликлари бўйича умумий ўқиш даврининг камида 50 фоизини давлат гранти асосида тамомлаган ҳамда махсус имтиҳондан муваффақиятли ўтган талабалар учун давлат тиббиёт муассасаларида мажбурий ишлаб бериш тартиби жорий этилади.

Мажбурий ишлаб бериш муддатлари қуйидагича белгиланмоқда:

Қорақалпоғистон Республикаси ва вилоятлардаги бирламчи тиббий-санитария ёрдами муассасаларида — камида 1 500 иш соати;

Туман (шаҳар) даражасидаги (Тошкент шаҳри бундан мустасно) бошқа даволаш-профилактика муассасалари ҳамда тиббиёт соҳасидаги давлат бошқарув органларида — камида 2 000 иш соати;

Қорақалпоғистон Республикаси ва вилоятлар даражасидаги даволаш-профилактика муассасалари ҳамда тиббиёт соҳасидаги давлат бошқарув органларида — камида 2 500 иш соати;

Тошкент шаҳри ва республика даражасидаги даволаш-профилактика муассасалари ҳамда тиббиёт соҳасидаги давлат бошқарув органларида — камида 3 000 иш соати.

Шу билан бирга, бакалавриат, резидентура ва магистратура мутахассисликларида ҳар бир ўқув модули бўйича академик кўрсаткичларни ўзлаштиришда, шунингдек давлат имтиҳонларида минимал ўтиш баллари белгиланади. Жумладан, шифокор мутахассисликлари учун — 70 фоиз, ўрта тиббий ходим мутахассисликлари учун эса 60 фоиз этиб белгиланиши кўзда тутилмоқда.