28–29 сентябрь кунлари инсон ҳуқуқлари бўйича V Самарқанд форуми ўтказилади

2026 йил 28–29 сентябрь кунлари Тошкент ва Самарқанд шаҳарларида Инсон ҳуқуқлари бўйича V Самарқанд форуми ўтказилади.
Форум «Инсон ҳуқуқлари тўғрисидаги халқаро пактларга 60 йил ва Ривожланиш ҳуқуқи тўғрисидаги декларацияга 40 йил: қадр-қиммат, тенглик ва барқарор ривожланиш йўлидаги глобал шериклик» мавзусига бағишланган.

Халқаро тадбирда турли мамлакатлардан халқаро ташкилотлар, давлат идоралари, миллий инсон ҳуқуқлари институтлари вакиллари, экспертлар, олимлар ҳамда фуқаролик жамияти вакиллари иштирок этиши кутилмоқда.

Форум 2026 йилда БМТнинг икки асосий ҳужжати — Фуқаролик ва сиёсий ҳуқуқлар тўғрисидаги халқаро пакт ҳамда Иқтисодий, ижтимоий ва маданий ҳуқуқлар тўғрисидаги халқаро пакт қабул қилинганига 60 йил тўлиши муносабати билан ўтказилмоқда. Мазкур ҳужжатлар 1966 йил 16 декабрда БМТ Бош Ассамблеяси томонидан қабул қилинган.

Шунингдек, 2026 йилда Ривожланиш ҳуқуқи тўғрисидаги БМТ декларацияси қабул қилинганига 40 йил тўлади.
Форумнинг асосий мақсади инсон қадр-қиммати, тенглик ва барқарор ривожланишни таъминлаш борасида глобал ҳамкорликни мустаҳкамлашдан иборат.

Муаллиф: Ҳасанбой ОЧУН