Афғонистон тадбиркорларининг Ўзбекистон визаси олиши енгиллаштирилади

Суҳбат чоғида икки давлат ўртасидаги савдо-иқтисодий муносабатларни янада кенгайтириш, хусусий секторлар алоқаларини мустаҳкамлаш ва ўзаро инвестицияларни рағбатлантириш масалалари муҳокама қилинди.

Учрашувда қуйидаги ташаббуслар илгари сурилди:

ҳар чоракда Тошкент, Қобул, Термиз ва Балх шаҳарларида B2B учрашувлар ташкил этиш;

Тошкент шаҳрида ACCI ваколатхонасини очиш орқали инвестицион алоқаларни фаоллаштириш;

Афғонистон тадбиркорлари учун бизнес визаларини расмийлаштириш ва таклифнома олиш жараёнларини енгиллаштириш;

Термиз порти орқали юк ташиш жараёнларини тезлаштириш ҳамда божхона тартиб-таомилларини оптималлаштириш;

ҳар йили Қобул ва Тошкент (ёки Мозори Шариф ва Термиз) шаҳарларида қўшма савдо кўргазмаларини ўтказиш.

Томонлар мазкур ташаббусларни амалга ошириш икки мамлакат ўртасидаги савдо ҳажмини ошириш, янги инвестиция лойиҳаларини йўлга қўйиш ва хусусий сектор ҳамкорлигини кучайтиришга хизмат қилишини таъкидладилар.

Учрашув якунида Даврон Ваҳобов Афғонистон делегациясининг ташрифини Ўзбекистон–Афғонистон иқтисодий ҳамкорлигида янги босқични бошлаб берувчи муҳим қадам сифатида баҳолади.