Болаларни ташиш қоидасини бузганлар ҳайдовчилик ҳуқуқидан маҳрум қилиниши мумкин

Тегишли қонун лойиҳаси Бош прокуратура томонидан жамоатчилик муҳокамаси учун эълон қилинди.

Жазо қандай бўлади?

Ҳужжатга мувофиқ, Маъмурий жавобгарлик тўғрисидаги кодексга янги 128−11-модда — «Болаларни ташиш ҳамда болаларни ташишни ташкил этиш қоидаларини бузиш» моддасини киритиш таклиф этилмоқда.

Лойиҳага кўра, болаларни ташиш қоидаларини бузган ҳайдовчиларга:

• БҲМнинг 30 баравари (12,36 млн сўм) миқдорида жарима;
• 1 йилдан 3 йилгача транспорт воситасини бошқариш ҳуқуқидан маҳрум қилиш жазоси қўлланилиши мумкин.

Агар қоидабузарлик ҳайдовчилик ҳуқуқига эга бўлмаган ёки транспорт бошқариш ҳуқуқидан маҳрум қилинган шахс томонидан содир этилса, унга:

• БҲМнинг 50 баравари (20,6 млн сўм) миқдорида жарима;
• ёки 15 суткагача маъмурий қамоқ жазоси қўллаш таклиф қилинмоқда.

Ташкилотчилар ҳам жавобгар бўлади

Қонун лойиҳасида болаларни ташишни ташкил этиш қоидаларини бузганлик учун ҳам алоҳида жавобгарлик белгиланмоқда.

Бундай ҳуқуқбузарлик учун:

• БҲМнинг 30 баравари миқдорида жарима белгиланиши таклиф этилган.

Агар мазкур қоидабузарлик маъмурий жазо қўлланилганидан кейин бир йил ичида такрорланса, жарима миқдори:

• БҲМнинг 50 бараваригача оширилиши мумкин.

Нега бу таклиф киритилмоқда?

Ҳужжатда қайд этилишича, йўл ҳаракати хавфсизлигини таъминлаш бўйича амалга оширилаётган ислоҳотларга қарамай, йўл-транспорт ҳодисаларида жабрланаётганлар орасида болалар улуши юқорилигича қолмоқда.

Бош прокуратура бунинг асосий сабабларидан бири сифатида вояга етмаганларни ташишда хавфсизлик талабларига тўлиқ риоя этилмаётганини кўрсатган.

Шунингдек, амалдаги қонунчиликда мазкур қоидабузарликлар учун аниқ ва самарали жавобгарлик чоралари етарли даражада белгиланмагани, бу эса бундай ҳолатларнинг кенг тарқалишига сабаб бўлаётгани таъкидланган.