Бухорода 211 марта қоидабузарлик қилган Tracker жарима майдончасига қўйилди

Бухоро вилоятида йўл ҳаракати қоидаларини 211 марта бузган Tracker 2 автомашинаси аниқланиб, вақтинча сақлаш учун жарима майдончасига жойлаштирилди. АвтҲомобил эгасига 137 миллион сўмлик маъмурий жарима ҳисобланган.

Мажбурий ижро бюроси маълумотига кўра, вилоятда ўтказилган рейдлар давомида 2,6 миллиард сўмлик 114 та ижро ҳужжати бўйича қарздорларга тегишли 98 та автотранспорт воситаси жарима майдончасига қўйилган.

Шунингдек, рейдлар натижасида 741 миллион сўмлик 70 та ижро ҳужжати бўйича қарздорликни ундириш амалда таъминланган.

Хусусан, Ромитан туманида яшовчи фуқарога тегишли Tracker 2 автомашинаси йўл ҳаракати қоидаларини бузгани аниқланган. Ҳайдовчи 211 марта қоидабузарлик содир этгани ва унга жами 137 миллион сўмлик маъмурий жарима ҳисоблангани маълум қилинди.

Қидирув тадбирлари давомида автомашина топилиб, вақтинча сақлаш учун жарима майдончасига жойлаштирилган.

Мажбурий ижро бюроси қарздорларга тегишли қидирувдаги автотранспорт воситаларини аниқлаш бўйича рейдларни давом эттирмоқда.

Муаллиф: Ҳасанбой ОЧУН