Кўп қаватли уйнинг ертўласида акула боқаётганлар аниқланди

"Фарғона шаҳридаги «Мурувват» МФЙ, Фарғона кўчаси, 78-уйда навбатдаги мониторинг ишлари олиб борилди", -дейилади Фарғона вилояти ҳудудий Қурилиш ва уй-жой коммунал хўжалиги соҳасида назорат қилиш инспекцияси хабарида.

Ўрганишлар давомида бир қатор қоидабузарликлар аниқланиб, уларни бартараф этиш бўйича ходимлар томонидан мажбурий кўрсатмалар берилган. Кўп квартирали уйнинг ертўла қисмидаги сунъий ҳовуз Вазирлар Маҳкамасининг “Кўп квартирали уйнинг ертўласидан фойдаланиш чора-тадбирлари тўғрисида”ги 648-сон қарори талабларига зид равишда ўрнатилган. Буни ташкил қилган шахс ертўланинг турли хоналарини тўсиб, ўзбошимчалик билан эгаллаб олгани ҳам аниқланган.

Ҳолат юзасидан мулкдорга нисбатан жойида маъмурий баённома расмийлаштирилиб, жаримага тортилди. Бундан ташқари, ичимлик сувидан ўзбошимчалик билан фойдаланиш ҳолати юзасидан Маъмурий жавобгарлик тўғрисидаги кодекснинг 163-моддаси (водопроводдан фойдаланиш қоидаларини бузиш) биринчи қисми билан тегишли баённома расмийлаштирилди.

Шунингдек, ертўлани 15 кун муддатда бўшатиб, асл ҳолатига келтириш бўйича ёзма кўрсатма ва тушунтиришлар берилган.

Муаллиф: Ҳасанбой ОЧУН