Ўзбекистон ва Чехия ўртасида авиақатновлар тикланади

Унда пойтахтлар ўртасида тўғридан-тўғри авиақатновларни қайта тиклаш муҳим йўналишлардан бири сифатида қайд этилди.

Президент матбуот хизмати маълумотига кўра, учрашувда савдо-иқтисодий алоқаларни янада ривожлантириш, товар айирбошлаш ҳажмини 1 миллиард долларга етказиш, шунингдек қўшма лойиҳаларни кенгайтириш масалалари кўриб чиқилди.

Қайд этилишича, сўнгги йилларда икки давлат ўртасидаги савдо ҳажми қарийб икки баробарга ошган. Айни пайтда Ўзбекистонда Чехия капитали иштирокида 37 та қўшма корхона фаолият юритмоқда.

Томонлар машинасозлик, “яшил” энергетика, кимё ва фармацевтика каби соҳаларда янги лойиҳаларни амалга ошириш бўйича келишиб олди. Шунингдек, автомобилларни Евро-6 стандарти бўйича сертификатлаш лабораториясини ташкил этиш ишлари ҳам давом этмоқда.

Инфратузилмани ривожлантириш, “ақлли шаҳарлар”ни жорий этиш ва рақамлаштириш соҳаларида ҳамкорликни кучайтириш режалари ҳам муҳокама қилинди. Бу борада Ўзбекистон–Чехия бизнес форумида илгари сурилган ташаббуслар қўллаб-қувватланди.

Шу билан бирга, Ишбилармонлар кенгашини ташкил этиш ва Ҳукуматлараро комиссия йиғилишини жорий йил август ойида Тошкентда ўтказиш таклиф қилинди.

Маданий-гуманитар соҳада таълим алмашинувлари, қўшма таълим дастурлари ва маданий тадбирларни кенгайтиришга келишилди. Туризмни ривожлантириш мақсадида икки мамлакат пойтахтлари ўртасида тўғридан-тўғри авиақатновларни қайта йўлга қўйиш масаласи алоҳида кўриб чиқилади.

Якунда томонлар қабул қилинган қарорларни амалга ошириш бўйича қўшма “йўл харитаси” ишлаб чиқишга келишиб олди.