Тошкент аэропортида 1,3 млрд сўмлик яширинча олтин тўхтатиб қолинди

Тошкент халқаро аэропортида хориждан Ўзбекистонга кириб келган фуқаронинг юки текширилганда, декларацияда кўрсатилмаган катта миқдордаги заргарлик буюмлари ва олтин қуймалари топилди.

Ҳолат “Тошкент-AERO” ихтисослаштирилган божхона комплексида аниқланган. Бу ҳақда божхона комплекси матбуот хизмати хабар берди.

Маълум қилинишича, фуқаро Дубай–Тошкент йўналиши бўйича мамлакатга кириб келган. Божхона назорати жараёнида унинг юклари кўздан кечирилганда, тегишли декларацияда қайд этилмаган қимматбаҳо буюмлар аниқланган.

Текширув давомида умумий соф оғирлиги 921,37 грамм бўлган 141 дона заргарлик буюми ҳамда 3 дона олтин қуймаси топилган.
Экспертиза хулосасига кўра, мусодара қилинган заргарлик буюмлари ва олтин қуймаларининг умумий қиймати 1 миллиард 293 миллион сўм деб баҳоланган.
Бундан ташқари, фуқаронинг юкидан акциз маркаси бўлмаган 120 қути тамаки маҳсулоти ва 90 дона никотинли снюс ҳам аниқланган.

Ҳозирда мазкур ҳолат юзасидан жиноят иши қўзғатилган. Тергов ҳаракатлари давом этмоқда.

Муаллиф: Ҳасанбой ОЧУН