Тошкент “Бродвей”и янгиланади

Бу ҳақда Тошкент шаҳар ҳокимлиги маълум қилди.

Маълум қилинишича, лойиҳа пиёдалар зонаси, хиёбонлар, яшил ҳудудлар ва шаҳар инфратузилмасини босқичма-босқич янгилашни назарда тутади.

Очиқ шаҳар муҳити сақланади

Ҳокимлик таъкидлашича, ҳудуд ўзининг очиқ шаҳар муҳити хусусиятини сақлаб қолади. Кўча рассомлари ва ижодий ҳамжамият вакиллари бу маконнинг ажралмас қисми бўлиб қолади.

“Лойиҳанинг вазифаси жонли шаҳар фаоллигини чеклаш эмас, балки уни тартибга солиш ва муҳитни қулай ҳамда хавфсиз қилишдир.”

Нималар ўзгаради?

Лойиҳа доирасида:

• йўл ва пиёдалар йўлаклари янгиланади;
• кириш ва ҳаракатланиш имкониятлари яхшиланади;
• тўсиқсиз муҳит яратилади;
• ёритиш тизими модернизация қилинади;
• кўкаламзорлаштириш ишлари кенгайтирилади;
• фавворалар реконструкция қилинади;
• рекламалар ва пешлавҳалар ягона дизайн-код асосида тартибга солинади;
• ноқонуний конструкциялар демонтаж қилинади;
• видеокузатув тизимлари жорий этилади.

Шунингдек, ҳудуддаги мавжуд дарахтлар кўрикдан ўтказилиб, қўшимча равишда камида 1000 та янги дарахт ва манзарали ўсимликлар экиш режалаштирилган.