Александр Федин барпо этган боғ давлат муҳофазасига олинади

Расмий маълумотга кўра, айни вақтда Александр Федин Термиз шаҳридаги тез тиббий ёрдам клиник шифохонасига жойлаштирилган бўлиб, унга зарур тиббий ёрдам кўрсатилмоқда. Шунингдек, уни муносиб яшаш шароитлари билан таъминлаш бўйича амалий ишлар олиб борилмоқда.

Бундан ташқари, Александр Фединни Экология ва иқлим ўзгариши миллий қўмитаси ҳузуридаги Ўрмон агентлиги тизимига ишга жойлаштириш чоралари ҳам кўрилмоқда.

Қўмита маълум қилишича, Александр Фединнинг мамлакат экологияси ва кўкаламзорлаштириш соҳасига қўшган ҳиссаси инобатга олиниб, у барпо этган боғни сақлаб қолиш ва ривожлантиришга қаратилган алоҳида ҳужжат ишлаб чиқилмоқда.

Лойиҳага мувофиқ, мазкур ҳудуд жамоатчилик учун очиқ экологик парк сифатида ташкил этилиб, Экология ва иқлим ўзгариши миллий қўмитаси тасарруфига ўтказилади.

Келгусида ушбу ҳудуд негизида жамоатчилик боғи ташкил қилиниб, унинг ноёб табиий меросини сақлаш ва янада бойитиш бўйича ишлар давом эттирилиши режалаштирилган.

Расмийлар Александр Федин тақдирига бефарқ бўлмаган барча фуқароларга миннатдорчилик билдирди.