Тошкентда сув тўпланишига қарши қандай чоралар кўрилади?

Ёмғир суви тизими қанча ҳажмга мўлжалланган?

Маълум қилинишича, Тошкентдаги мавжуд ёмғир сувларини оқизиш тизими бир кеча-кундузда 20 мм гача ёғинни қабул қилишга мўлжалланган.

Ишлаб чиқилган бош режага мувофиқ, тизим қувватини босқичма-босқич 36 мм гача ошириш режалаштирилган.

8 та туманда сув тўпланиши кузатилди

Кучли ёғингарчилик натижасида шаҳарнинг 8 та туманидаги 23 та манзил бўйича сув тўпланиши ҳақида мурожаатлар келиб тушган.

Туманлар кесимида ҳолат қуйидагича:

• Мирзо Улуғбек тумани — 6 та манзил
• Яшнобод тумани — 3 та
• Шайхонтоҳур тумани — 4 та
• Миробод тумани — 3 та
• Яккасарой тумани — 1 та
• Олмазор тумани — 2 та
• Чилонзор тумани — 2 та
• Юнусобод тумани — 2 та

Ҳокимликка кўра, айрим нуқталарда сув ҳажми мавжуд ариқ ва қувурлар қувватидан ошиб кетгани сабабли кўчаларда сув йиғилиб қолган.

Вазирлик ва коммунал хизматлар жалб қилинди

Оқибатларни бартараф этиш учун Фавқулодда вазиятлар вазирлиги, коммунал хизматлар, дренаж тизимлари ва бошқа ташкилотлар мутахассислари жалб этилган.

Ҳудудларда 60 дан ортиқ махсус техника ишлаган ва сув тўпланиши оқибатлари бир соат ичида бартараф этилгани айтилди.

Қандай ишлар амалга оширилади?

Муаммоли ҳудудларда қуйидаги чоралар режалаштирилган:

• 5 та манзилда янги ирригация тизими қуриш
• 3 та қўшимча дюкер ўрнатиш
• Диаметри 800 мм ва 500 мм бўлган қувурлар ётқизиш
• Қўшимча насос агрегатлари ўрнатиш
• 6 та янги сув қабул қилиш панжарасини монтаж қилиш
• Айрим ҳудудларда сув ўтказиш қувватини ошириш

Шунингдек, сув оқизиш тизимларини чиқиндилар билан тўсиб қўйиш, ноқонуний қурилишлар ва ариқларни ёпиб қўйиш каби омиллар ҳам вазиятни оғирлаштиргани қайд этилди.