Тошкент метросида бир йўловчи сабаб вагондаги барча йўловчилар туширилди

Тошкент метрополитенида йўловчилар хавфсизлигига таҳдид солувчи ҳолат қайд этилди. Метрополитен матбуот хизмати хабар беришича, бир йўловчининг қоидабузар ҳаракати оқибатида поезд вагонлари эшиклари ишдан чиққан.

Маълум қилинишича, 16 декабрь куни соат 16:23 да “Мустақиллик майдони” бекатидан “Пахтакор” бекати томон йўл олиши керак бўлган 16-сонли ҳаракат таркиби йўловчиларни қабул қилиб, эшикларини ёпаётган вақтда йўловчилардан бири вагонга кириш мақсадида эшикни куч билан очишга уринган.

Натижада эшикни ҳимоя қилувчи механизм ишдан чиққан. Машинист томонидан носозлик вақтинча бартараф этилганига қарамасдан, кейинги бекатга етиб бормасдан яна такрорланган. Шундан сўнг йўриқномага мувофиқ, барча йўловчилар бекатга туширилиб, ҳаракат таркиби электродепога олиб кетилган.

“Тошкент метрополитени” ДУК йўловчиларга мурожаат қилиб, метро объектларида хавфсизлик талабларига қатъий риоя қилиш ва давлат мулкига зиён етказмасликка чақирди.

“Биргина эътиборсизлик ҳам сиз ва бошқа йўловчилар ҳаёти учун хавф туғдириши мумкин”, — дейилади расмий огоҳлантиришда.

Шунингдек, метрополитен раҳбарияти метрода ҳаракатланиш қоидаларини яна бир бор эслатди:

• бекатга яқинлашганда вагондан тушиш учун эшикларга олдиндан яқинлашинг;
• вагондан чиқаётган йўловчиларга аввал йўл беринг;
• йўловчилар тўлиқ тушиб бўлгач, вагонга чиқинг;
• вагонга киргач, эшик олдида тўхтаб қолманг, вагон ўртасига ҳаракатланинг;
• метро вагонлари эшикларига суянманг;
• бекат ва йўлакларда ҳаракатланишда “ўнг қўл” қоидасига амал қилинг.

Қайд этилишича, мазкур қоидаларга риоя қилиш барча йўловчиларнинг хавфсизлиги ва қулай ҳаракатланишини таъминлайди.